السلام عليكم و رحمة الله و بركاته
ادي اول اسبوع بعد نهاية الامتحانات خلص ، و ما زال عندي شوية اكتئاب ، شكله كدا من اثار الامتحانات ! - بقالي اكتر من شهر فحت و ردم ! -
في حاجات كتير ناوي اعملها ان شاء الله ، بس مليش نفس لأي حاجة خالص ، ولا حتى القعاد على الكمبيوتر !
مش عارف في ايه بالظبط ، بس حاسس اني مخنوق من كل حاجة !
و ما شاء الله الاجازة شكلها مبشرة يعني !
مش عارف ايه النظام ده ، الواحد يقعد على الكمبيوتر في الدراسة يلاقي اهله يقولوله قوم ذاكر ، يقعد في الاجازة يقولوا ارحم نفسك من الكمبيوتر !! ، مش عارف اعمل ايه يعني !
و والدي مش عارف ماله بيا بقاله فترة كدا زي ما يكون مستقصدني ، و كأن البيت كله خلص من المشاكل و مفيش غيري !
شوية يقعد يكلمني عن التخن و اضراره و انه وحش و مش عارف ايه كدا ، مع انه المفروض عارف اني في فترة الامتحانات طبيعي جدا بتخن شوية عشان نشاطي بيكون محدود شوية و بحاول اركز في المذاكرة ، دا غير اني مش بتخن اوي يعني ، هما كلهم خمسه سته كيلو يعني ! ، و مع اول نشاط بعد ما الامتحانات تخلص برجع عادي خالص !
و برده شوية يكلمني على طول الشخص و ازاي بيأثر في حياته ، و ان مفيش حد بيرضى بالرجالة القصيرين لما يجو يتجوزو و مش عارف ايه ! ، و اني مش ببذل نشاط كبير او بلعب رياضة عشان كدا انا قصير !
طيب اعمل ايه يعني ؟ ، مثلا وزن الواحد ممكن الواحد يتحكم فيه - و ان كان في ناس فعلا مهما عملت بيكون تحكمها في وزنها صعب ، دول يموتوا نفسهم يعني ولا ايه ؟ - ، انما بالنسبة للطول دي حاجة بشكل اساسي وراثية و جزء كبير منها بيتحدد بالوراثة ! - مع ان والدي طويل يعني - ، و برده مع ذلك انا مش قصير اوي ، انا في حدود 171 - 172 سنتي ، يعني مع الشعر و الكوتش ببقي كأني 175 سنتيمتر !!
و الله انا مش هقعد اشغل نفسي بشيء مش بيدي ! ، انما اشغل نفسي بحاجة اقدر اتحكم فيها ، اطور من نفسي ، و ازود مهاراتي و معارفي !
و الموضوع اساسا مش هيفرق يعني في اي حاجة ! ، هو بس في نقطة الجواز دي هتفرق شوية على المستوى الاجتماعي ، و ان الست لازم تكون اقصر من الراجل و مش عارف ايه كدا ، ماشي مفيش مشاكل يعني ، البنات يومين دول خلاص يعني مش ناطحات سحاب ، اكيد هلاقي بنت في حدود الـ 170 سنتي - محدش بس يقولي ان الطول مش مهم خالص ، لا مهم ، و في اكتر من منتدى و خصوصا في المنتديات الطلابية ، اتفتح مواضيع زي دي ، و هل البنت تقبل بولد اقصر منها ولا لأ ، و اغلبهم قال لأ ، و حتى اللي قال ايوه ، مع الوقت و اختلاطهم بالناس اجتماعيا ، كتير منهم هيغير رأيه لـ "لأ" برده - : )
و مع العلم ان اخويا الاصغر مني على طول بقى اطول مني دلوقتي و اخويا الوسطاني قرب يبقى اطول مني ، و معنديش مشاكل يعني و مش هموت نفسي !!
و برده شوية كمان ، يقعد يكلمني عن الكمبيوتر بيخلي الواحد مش اجتماعي ، و بيجيب اكتئاب ، و المفروض انزل اتعامل مع الناس في الحياة الواقعية ، و الكلام ده !
ماشي يعني ، مفيش مشاكل ، بس انا مش من النوع اللي بيحب ينزل الشارع عمال على بطال كدا ! ، بنزل الشارع عشان غرض معين و ارجع تاني ، و لازم يكون غرض محدد و ذو قيمة ! ، مش بعرف انزل و اتصرمح في الشوارع كدا ولا اقف على النواصي ، ولا اقعد مع اصحابي نقعد نجيب في سيرة الناس و ننم ده و نغتاب ده !
اي نعم انا بصنف نفسي اني من المدمنين على الكمبيوتر/الانترنت ، بس اذا كان عندي مسئولية او شيء المفروض اعمله بعمله ، و بقية الوقت بقعد على الكمببيوتر اعمل حاجة مفيدة برده ! ، يعني الموضوع في كل الحالات مش خارج عن الحد !
اللي يغيظيني بقى ان بقدرة قادر كل ده مرتبط بالكمبيوتر بطريقة ما ، و ان في رابط عجيب بين الحاجات دي كلها و بين اني بقعد على الكمبيوتر !!!
---------------------------------------
عموماً ، انا حالياً بدور على اي شغل بعيد عن البيت ، و بعيد عن المنطقة كلها اساساً ، ربنا يسهل و الاقي شغله كويس و متكنش مملة !
ممكن شوية كدا ، و اعمل موضوع عن الحاجات اللي عملتها الفترة اللي فاتت دي ، حتى على الاقل اصحي المدونة شوية : )
# لقيت حاجة شكلها حلو ، اروح اجربها و اعمل موضوع عنها
How to Run Android Applications on Ubuntu
تنويه !
تم الانتقال لمدونة جديدة ، تجدها هنا مدونة أحمد م. أبوزيد !
