أول تدوينة في السنة الجديدة : )

السلام عليكم و رحمة الله و بركاته

بما ان معايا لابتوب واحد صاحبي ، قولت اكتب تدوينة على السريع كدا : )

----

أستقبلت أول يوم في السنة الجديدة بمغص معوي شديد ، من حوالي الساعة خمسة فجر أول يوم لحد يا دوب لسه حاسس بتحسن من كام ساعة بس .
مع اني مش فاكر اني كلت اي حاجة غريبة ، بس الواضح انه كان في ميكروب في حاجة كلتها أو اني اخدت برد ! (مش وقته خالص اساسا !) طبعا في الحالات اللي زي دي مفيش احسن من الينسون ، الشمر ، كراوية و النعناع : )


من ناحية تانية ، فاضل حوالي اسبوعين على الامتحانات ، المواد التيرم ده حلوة بس مش قادر اركز بشكل كويس : (
حاسس اني مش مجمع كويس !! هحاول اركز مجهودي في الاسبوع ده عشان اراجع على الحاجات اللي لسه مخلصتهاش : )
دعواتكم بقى : )


من كام ساعة اكتشفت ان في شبكة وايرلس قوية واصلة في الغرفة اللي بذاكر فيها ، و بيستخدم تشفير wpa ، اعتقد ان دلوقتي فك الشتفير ده بقى سهل ، بالكتير ربع ساعة و يكون خلصان ، اخلص بس الامتحانات و العب شوية مع الشبكة دي (هجرب بس كسر التشفير مش هعمل حاجة )



اخيرا ، اعتقد اني سأكون "أحمد أبوزيد"على الانترنت و مش هيكون في "Skeleton_Eel" تاني ، هكون على الانترنت بهويتي الحقيقية بدل الاسم المستعار اللي كنت عايش بيه لمدة اربع سنين تقريبا على الانترنت .
انا خلاص تقريبا اتخذت قراري ، و ده لعدد من الاسباب ممكن ابقى اعمل موضوع عنها لما اخلص الامتحانات ان شاء الله ، و بدأت خطوات الانتقال ، اسم الايميل هيتغير و كمان رابط المدونة (و طبعا واجهت اول مشكلة من المشاكل اللي عشانها كنت اختارت استعمال اسم مستعار جديد و فريد ، و هي مشكلة ان الاسم ممكن يكون حد مستخدمه في المنتديات و المواقع زي بريد gmail) .

بالاضافة اني قررت عمل بعض التغييرات في كذا حاجة تانية مهمة .


عموما ، الموضوع هيخلص ان شاء الله بعد الامتحانات : )



--------


دعواتكم بقى عشان الامتحانات دي شكلها مش مبشر خالص :s
و يا رب تكون السنة الجديدة دي سنة جميلة علي كل الناس و يتحقق فيها كل اللي بيحلموا بيه : )

عيد اضحى سعيد : )

السلام عليكم و رحمة الله و بركاته


كل سنة و انتوا طيبين : )

- - - - - -

مش عارف مالي منشكح انهاردة كدا ليه و حاسس بطعم ليلة العيد فعلا ! (مع انه عيد لحمة يعني D:)
يا رب يكون عيد كويس على كل الناس : )

و الواحد كدا يستعد للاكلات الرسمية للعيد ، فتة ، رقاق ، مكرونة بالبشاميل و الذي منه



و يا رب يكون العيد ده وقت للهدوء و التسامح فيما يتعلق بالاحداث الاخيرة بين مصر و الجزائر .
انا مش عاوز اتكلم في الموضوع ده لاني خلاص اتقرفت من كلام مع المصريين و الجزائريين ! كل شعب عاملي فيها شعب الله المختار و بيتعصب لنفسه على حساب الحق و يخلط الحابل بالنابل ! زهقت من عصبية الجاهلية المنتة اللي انتشرت الفترة اللي فاتت ! كل شعب عمال يتهم التاني انه سبب المشكلة ! مع ان الاتنين غلطانين ! و حتى العقلاء من الجانبين كان موقفهم ضعيف للاسف !

اللي حصل حصل ، لكن انا فعلا استفد كتير من اللي حصل ده ! و اكتشفت مدى قلة الوعي عند شعوبنا ! و اكتشفت طريقة التفكير الحقيقة لبعض الاشخاص اللي كنت بحترمهم !
و يبدوا ان مصر و الجزائر اقرب مما نتصور ! البلدين اتقاسموا المركز ١١١ في تقرير الشفافية و الفساد الدولي لسنة ٢٠٠٩ !! (اساسا عدد الدول في التقرير 180 دولة ، يعني احنا الاتنين في اسوء المراكز و خيبتنا مشتركة ما شاء الله !!)

عموما بلاش تخريب المناسبة دي بالكلام عن اللي حصل ، انا اتكلمت كتير في المنتديات و راح صوتي من كتر الكلام !


- - - -

عيد سعيد على كل الناس و براحة على جهازكم الهضمي p:

^_^

دورة تنمية مهارات الخط العربي في جامعة القاهرة .

السلام عليكم و رحمة الله و بركاته

انهارده حضرت أول محاضرة من 10 محاضرات لتنمية مهارات الخط العربي ، المحاضرات تبع جامعة القاهرة و بتقدم بشكل مجاني ، و كانت محاضرة لطيفة جداً .

الدورة دي جت في معادها تمام ، لان موضوع الخطوط و الكتابة من الحاجات اللي مهتم بتنميتها الفترة اللي جاية .
كنت من وقت للتاني بشوف برنامج بيجي على قناة الهدى و هى قناة اسلامية لغير الناطقين بالعربية و برامجها بتتقدم باللغة الانجليزية ، البرنامج ده كان عن تعليم الخط و اغلب الناس اللي بتتعلم لغتهم الام مش العربية ، كان شعور جميل جداً ان الواحد يشوف مدى شغفهم بتعلم الخط العربي ، و دي كانت حاجة محفزة جداً ليا ، ازاي اكون عربي و مش بكتب بشكل يليق بلغة زي العربية !
بالمناسبة خطي مش وحش ، لكن احب يكون افضل : )



المحاضرة كانت لذيذة جداً و الاستاذ اللي كان بشرح لطيف جداً و شرحه حلو ما شاء الله .
ربنا يسهل في بقية المحاضرات و تكون بداية لتعلمي فن الخط العربي : )

و احب اقول تاني ، المحاضرات مجانية ، و لو حبيت تحضر تعالا و سجل اسمك بداية من المحاضرة الجاية ، الدورة معمولة في راعية الشباب (جنب الملاعب) كل يوم حد و اربع من الساعة اتنين للساعة اربعة .

: )

عشرون سنة لي و سنة لها : )

السلام عليكم و رحمة الله و بركاته

المفروض ده كان موضوع عن اتمامي العشرين ، لكن في الحقيقية انا تميت العشرين من خمس شهور ! - كان قبل تلات ايام من اول امتحان في الفصل الدراسي التاني لسنة تالتة - ، تميتها في 21 مايو 2009 : )
لكن كان لازم كتابة الموضوع ده : )
و بالمرة اتكلم عن اتمام المدونة سنتها الاولى - تمتها من شهرين و شوية ! -

-------------

العشرين ، يعني بداية عِقد جديد من عمري ، يعني فاضل سنة واحدة و اكون بالغ رشيد قانوناً و اكون شخصية قانونية مستقلة تماماً عن والدي ، يعني اخر سنة في الدراسة ، يعني اقرب للجيش و للحياة الاخرى ما بعد الجيش ، يعني اكثر وعياً و نضجاً ، و يعني و يعني و يعني : )

مع مرور كل سنة المفروض ان الواحد يعمل لنفسه تقييم شامل للسنة اللي عدت ، بالنسبة ليا انا سعيد جدا بالسنة اللي فاتت ، قدرت اتخلص من عدد من العيوب ، و اضيف عدد من المميزات بالاضافة الى اكتسابي المزيد من الخبرات ، و الاهم زادت ثقتي بنفسي : )

بداية السنة دي كانت غريب جدا ، هو مش نوع من التشاؤم او التطير ، انما حاجة لاحظتها فقط : )
في اول تلات ايام فيها اتكهربت ، اتصبت في ايدي بحرق بحجم عملة معدنية - من بتاعت ايام زمان مش العملات بتاعت اليومين دول D: - ، اتدلق عليا شوربة مولعة !

الغريب في الموضوع ان الحاجات دي محلصتش معايا من فترة كبيرة جداً ، من ايام ابتدائي و اعدادي بالرغم من اني مش الشخص الحذر اوي ! (تقريبا عجزت و ردت فعلي بقت بطيئة ههههههههههههه) ، بس بصراحة كان نفسي بتهفني على الكهربا ، الواحد بقاله متكهربش (اليوم اللي قبله كنت بقول في دماغي انا بقالي كتير متكهربتش ، تاني يوم راح حصل هههههههههه)

-------

لكن بما اني كملت العشرين ، محتاج اقرا اكتر في مجالات معينة : )
زي ؟ معلومات عامة عن الامراض الوراثية و الوبائية ، معلومات عن التربية - بصراحة مش ناوي عيالي تتربى حسب الظروف ! - ، محتاج اقرا في اصول الدين و العقيدة اكتر ، عاوز اراجع على قواعد اللغة العربية ، و ناوي ان شاء الله ارجع احفظ قرآن ، و بإذن الله اراجع جزء عم قبل نهاية السنة دي .

جربت قبل كدا تحفظ القرآن بالكتابة ؟ ، اعتقد ان ناس كتير بتحاول تحفظ القرآن بالقراءة ، اعتقد موضوع القراءة ده مش مناسب لناس كتير خصوصاً في عصرنا ده لان حاجات كتير بتخلي الواحد مشتت و ذهنه مش حاضر ديماً ، لكن الكتابة اكتر قدرة على تثبيت النص ، على الاقل ده بالنسبة ليا ، عشان كدا مش بعرف اذاكر غير بالكتابة ، جرب الطريقة دي ممكن تكون مناسبة ليك : )


و لسه في احاجات كتير عاوز اعملها بإذن الله : )

---------------------

بالرغم من مرور اكتر من سنة على المدونة ، مازلت صفحة "عن skeleton eel اتحدث" ، لسه فاضية ، اعتقد اني هرجع اعدلها في الكام يوم دول .


كنت عاوز اكتب كام حاجة كمان ، بس نسيت ! فكفاية كدا دلوقتي : )

عيد سعيد : )

السلام عليكم و رحمة الله و بركاته


الصورة من : سوالف .

بغض النظر عن اننا بقينا في تالت يوم العيد ، لكن برده يمنعش اكتب تهنئة بالعيد : )



من كام ساعة لسه راجع من فرح احمد المعروف على النت بإسم "مبتدئ" ، المفتري كان عامل الفرح في راس البر O_o - عشان تقريبا زوجته من هناك -
بس هما كانوا مجهزين ميني باص للناس بتوع القاهرة ، بصراحة كان فرح ممتاز جدا ما شاء الله ^_^
مين قال ان الافراح الاسلامية رخمة او كئيبة ؟ : )



الفرح ده عاوز موضوع لوحده ، انا دلوقتي محتاج اناااام : )

و كل سنة و انتوا طيبين ، و ان شاء الله يكون عيد سعيد عليكم جميعاً : )

كل سنة و انتوا طيبين : )

السلام عليكم و رحمة الله و بركاته

مصدر الصورة

------------------

كل سنة و انتو طيبين و ان شاء كل الناس تكون بصحة و سلامة : )

ان شاء الله اول يوم رمضان بكرة ، و الجميل في الموضوع ان تقريبا كل الدول العربية - بغض النظر عن ليبيا ! - ، و كمان معظم الدول الاسلامية هتبدأ الصيام بكرة ^_^

الواحد بقاله كتير محسش الاحساس ده : )

و ان شاء الله يكون رمضان كويس ، و نقدر نستفاد بكل دقيقة فيه ، ولا اصدق من قول الرسول صلى الله عليه و سلم ، (( عن أبي هريرة - رضي الله عنه - أن رسول الله - صلى الله عليه وسلم - قال: "من قام رمضان إيمانًا واحتسابا غُفر له ما تقدم من ذنبه" ، متفق عليه . ))

---------

و حاولوا تبعدوا عن المسلسلات الشريرة و المغرية اللي بتتعرض في حرب مسلسلات رمضان D:
و كمان براحة على جهازكم الهضمي D:


كل سنة و انتم بخير ، و شكرا لكل اللي سأل عليا و اتصل بيا : )

يوم الهندسة المصري 2009 .

السلام عليكم و رحمة الله و بركاته

الواحد بقاله فترة نفسه مقفوله عن اي حاجة بسبب كذا موضوع ، بس اليومين دول في حاجات تشرح القلب يعني ، و تخلي الواحد نفسه مفتوحة تاني : )

المهم ، ،

يوم الحد اللي فات كان يوم جميل جدا ، حضرت يوم الهندسة المصري 2009 (هما فعلا تلات ايام + اليوم صفر ، بيكون فيه تجهيزات و حاجات زي كدا)
لكن الاجمل فعلا اني قابلت واحد حبيبي جدا من المنصورة ، محمود المعروف برده بإسم cis.falcon ، اول مرة اشوفه على ارض الواقع ، و ما شاء الله عليه ، كان لطيف جدا زي ما هو على الانترنت : )

محمود كان ضمن مجموعة من حاسبات و معلومات المنصورة ، تقريبا الهدف الاساسي بتاع المجموعة انهم يشوفوا الافكار المطروحة في اليوم ده عشان يحددوا مشاريع التخرج بتاعتهم هتكون عن ايه .

انا برده كان هدفي الاساسي اشوف المشاريع الموجودة ، بس طبعا مش عشان مشروع التخرج D: ، كنت عاوز اشوف الافكار و اللغات البرمجية المستخدمة ، و مدى معرفة المشاركين بالبرمجيات الحرة / مفتوحة المصدر ، و طبعا كان في مشاريع كتير تانية بتعتمد على الهارد وير مش السوفت وير ، و ده حال اغلب الناس اللي في هندسة .

كان في تباين بين المشاريع من ناحية الافكار ، و من ناحية اللغات البرمجية المستخدمة بشكل اساسي مشاريع كتير معموله بالجافا ، و تاني لغة هى سي شارب ، و كان في حضور للدوت نت بشكل عام .

و بالنسبة لفكرة البرمجيات الحرة و مفتوحة المصدر ، كان في تباين برده ، في ناس واضح انهم عندهم خلفية كويسة عن الموضوع ، و كانوا على استعداد لتقديم الكود البرمجي لمشروعهم ، و في ناس تانية كانوا رافضين فكرة انهم يطلعوا الكود اساسا ، و في ناس كمان كانت مش عاوزه تطلع الكود بحجة انهم تعبانين في المشروع و الكلام ده - على اساس ان الناس اللي فاتحين مصدر مشروعهم مش تعبانين فيه ؟ - ، و من كلامهم مش عارف اذا كانوا اساسا عارفين الفكرة الاساسية في البرمجيات الحرة او المفتوحة المصدر ولا ﻷ ، ولا هو مجرد طريقة للتهرب من اظهار الكود - طبعا ليهم الحق في تحديد اذا ما كان كود مشروعهم هيكون متاح ولا لا ، بس اتمنى يكون فاهمين فكرة البرمجيات المفتوحة المصدر بشكل مظبوط ! -

-------
في كذا مشروع وقفنا عنده ، و اتكلمنا مع الناس اللي عاملينه ، منهم مشروع المفروض انه خوارزمية لتحديد تشكيل الحروف ، هما بيقولوا نسبة الخطأ فيه حوالي 20٪ ، يعني 80٪ بيكون صح ، عموما معرفتش اسمع كويس لان كان في دوشة جامدة و انا جيت في نص الكلام ، بس شكله مشروع كويس جدا !

في كذا مشروع تاني عن تحول النصوص لكلام مسموع text to speech ، في واحد منهم كان بس عبارة صوت كل حرف و بيتجمع ، و مفيش مراعاة للتشكيل ! ، يعني مثلا كلمة "كتاب" ، عبارة عن صوت حرف ك ، ت ، ا ، ب !! ، ده كان جافا .

و احد تاني جافا كان بيحول الاصوات لاوامر - speech command - ، المشروع كان بيعتمد على مكتبة/اطار عمل اسمه sphinx بيحدد طريقة نطق الكلام - صفحة مشروع سفنكس - ، يعني مثلا كلمة linux ، لو كتبناها زي ما بننطقها ، تكون كدا lee - no - x ، فانت لما بتطق لينوكس بالشكل ده ، برنامج سفنكس يعرف انك تقصد linux ، ممكن بقى تستخدمها في اي حاجة تاني ، مثلا التنقل بين الصفات ، لو عندك ملف pdf ، و عاوز تروح للصفحة رقم 10 ، تقول page ten ، البرنامج هيحولك على صفحة 10 ، و برده لو عاوز تروع مثلا الفصل التاني ، تقول chapter two ، مش عارف بقى اذا كان سفنكس بيدعم حاجة تانية غير الانجليزي ولا لا ، خصوصا العربي !!
مشروع تاني بالجافا ، كان للتحكم في الكومبيوتر بالموبايل عن طريق النت ، شوفت برامج زي كدا بس عن طريق البلوتوث ، المشروع جميل بس مكنش بيستخدم اي تشفير تقريبا ! ، و لما سألت على جزئية التشفير دي واحد من المشاركين في المشروع قالي حاجات غريبة كدا و انه مش محتاج تشفير او حاجة زي كدا ! ، مش عارف ازاي بس اكيد لو الجهاز اللي بيتحكم فيه ضمن شبكة و مفيش تشفير ، اي واحد على الشبكة سهل جدا يعمل sniffing و يلقط الباسورد !
في مشروع تاني جميل عبارة عن سوفت وير و هارد وير في نفس الوقت ، المشروع عبارة عن نظام حضور و انصراف للموظفين ببصمة الصوابع - كدا مفيش حد هعرف يزوغ من الشغل خالص D: -
المشروع معمول بالسي شارب ، و بيتعامل مع قاعدة بيانات ms sql ، و الهارد وير هما عاملينه كله ماعدا الجزء اللي فيه العدسة اللي بتاخد شكل البصمة ، و جزء تاني اضافي عشان يدعم الوايرلس ، المشروع جميل جدا ، و عملي جدا ، بس لما علقت على جزئية انه مكتوب بالسي شارب ، و بالتالي فعليا هيكون موجه لمنصة وندوز ، قالي ان في دوت نت للينوكس من ميكروسوفت !! ، و انه غير مشروع مونو المفتوح المصدر !! ، قعدنا نتكلم في الجزئية دي شوية ، قلت يمكن في ، بس اكيد الموضوع هيكون فيه حاجة غلط !!
يا اما النسخة قديمة جدا ، و يا اما في حاجة في الترخيص ، و لما رجعت بحثت على الموضوع ده ، و يا للمفاجئة !! ، كما توقعت النسخة بتاعت اليونكس قديمة جدا بالنسبة لاصدارات الدوت نت بتاعت الوندوز ، و الترخيص بتاعها محدود جدا ! ، للاستعمال التعليمي و الاكاديمي فقط ، و مينفعش تشغل عليها اي حاجة تجارية ، يعني مينفعش تستفاد منه فعلا !!
مشروع تاني جميل كان عمول بالسي شارب ، نقدر نقول بشكل مختصر انه كان عن اشكال البحث و الربط بين الاسئلة ، زي البحث الضبابي - fuzzy search -
المشروع كان بعتمد على سور القرآن ، يعني مثلا ممكن تضيفله اي سورة ، و مثلا ، و تكتب في البرنامج "من نوح ؟" ، هيجيبلك المعلومات اللي ليها علاقة بسؤالك بشكل منظم و على اساس السؤال اللي انت سألته البرنامج بيحدد تنظيم الجواب - على حسب ما فهمت يعني - ، و بما انه بيدعم البحث الضبابي ، فمفيش مشكلة مع التشكيل ، او الهمزات ، و كدا يعني
الجميل بقى ، لقيت مجموعة عاملين مشروع عن نظام اندرويد المفتوح المصدر ، مشروعهم كان عبارة عن برنامج بيستفيد من مزايا خرائط جوجل ، و الـ gps - و اللي مكنش مسموح بيه في مصر لحد كام شهر !! الحكومة كانت بتقول عشان اسباب امنية و مش عارف ايه كدا ! - ، مش بس مجرد توضيح مكانك على الخريطة ، انما بيوضحلك الحاجات بشكل ديناميكي ، يعني مثلا لو انت جنب نادي ممكن تعرف ايه الاحداث المقامة فيه حاليا ، او ممكن تعرف ايه الاحداث المقامة في قاعة المؤتمرات ، و شوية حاجات تانية كدا ، تقريبا الفكرة عاملة زي google latitude
---------------
دول بعض المشاريع اللي وقفنا عندهم و اتناقشنا مع الناس اللي مشتركين فيهم ، و كان في كذا مشروع تاني عن الهارد وير ، بس بشكل عام .

اهم حاجة لما تتكلم مع الناس اللي عاملين المشاريع ، متحاولش تحبطهم او تقلل من المجهود اللي عملوه في المشروع مهما كانت العيب اللي فيه : )

و بشكل عام اليوم كان جميل جدا ، و المجموعة اللي قابلتها كانت جميلة جدا ، و كل واحد متخصص في حاجات مختلفة ، منهم الجافا ، و php ، شبكات سيسكو و .net ، مجموعة جميلة و لطيفة فعلا : )
ان شاء الله متجمعين في الخير ديما : )

------

دي صورة للاعلان عن اليوم ده - و نفس صورة المجلد/حافظة الاوراق اللي بيسلموها للواحد اول ما يدخل مع جدول بيوضح احداث و معلومات عن اليوم ده -

----

بس فعلا استمتعت جدا : )