السبت، ٢ يناير ٢٠١٠
في
٥:٢١ م
التسميات:
{
احداث و مناسبات,
تبعي
}
السلام عليكم و رحمة الله و بركاته
بما ان معايا لابتوب واحد صاحبي ، قولت اكتب تدوينة على السريع كدا : )
----
أستقبلت أول يوم في السنة الجديدة بمغص معوي شديد ، من حوالي الساعة خمسة فجر أول يوم لحد يا دوب لسه حاسس بتحسن من كام ساعة بس .
مع اني مش فاكر اني كلت اي حاجة غريبة ، بس الواضح انه كان في ميكروب في حاجة كلتها أو اني اخدت برد ! (مش وقته خالص اساسا !) طبعا في الحالات اللي زي دي مفيش احسن من الينسون ، الشمر ، كراوية و النعناع : )
من ناحية تانية ، فاضل حوالي اسبوعين على الامتحانات ، المواد التيرم ده حلوة بس مش قادر اركز بشكل كويس : (
حاسس اني مش مجمع كويس !! هحاول اركز مجهودي في الاسبوع ده عشان اراجع على الحاجات اللي لسه مخلصتهاش : )
دعواتكم بقى : )
من كام ساعة اكتشفت ان في شبكة وايرلس قوية واصلة في الغرفة اللي بذاكر فيها ، و بيستخدم تشفير wpa ، اعتقد ان دلوقتي فك الشتفير ده بقى سهل ، بالكتير ربع ساعة و يكون خلصان ، اخلص بس الامتحانات و العب شوية مع الشبكة دي (هجرب بس كسر التشفير مش هعمل حاجة 
)
اخيرا ، اعتقد اني سأكون "أحمد أبوزيد"على الانترنت و مش هيكون في "Skeleton_Eel" تاني ، هكون على الانترنت بهويتي الحقيقية بدل الاسم المستعار اللي كنت عايش بيه لمدة اربع سنين تقريبا على الانترنت .
انا خلاص تقريبا اتخذت قراري ، و ده لعدد من الاسباب ممكن ابقى اعمل موضوع عنها لما اخلص الامتحانات ان شاء الله ، و بدأت خطوات الانتقال ، اسم الايميل هيتغير و كمان رابط المدونة (و طبعا واجهت اول مشكلة من المشاكل اللي عشانها كنت اختارت استعمال اسم مستعار جديد و فريد ، و هي مشكلة ان الاسم ممكن يكون حد مستخدمه في المنتديات و المواقع زي بريد gmail) .
بالاضافة اني قررت عمل بعض التغييرات في كذا حاجة تانية مهمة .
عموما ، الموضوع هيخلص ان شاء الله بعد الامتحانات : )
--------
دعواتكم بقى عشان الامتحانات دي شكلها مش مبشر خالص :s
و يا رب تكون السنة الجديدة دي سنة جميلة علي كل الناس و يتحقق فيها كل اللي بيحلموا بيه : )
الاثنين، ١٤ ديسمبر ٢٠٠٩
في
٥:٣٩ م
التسميات:
{
تبعي,
ملخص
}
الأربعاء، ٢ ديسمبر ٢٠٠٩
في
٥:٤١ م
التسميات:
{
تبعي
}
السلام عليكم و رحمة الله و بركاته
من وقت للتاني بحاول اكسر حدود العالم الافتراضي اللي عايشين فيه و اللي اتعرفت من خلاله على عدد كبير من الناس ، و عشان كدا بحاول اقابل بعض الناس اللي اتعرفت عليها من النت اذا جت فرصة مناسبة .
تالت يوم العيد ، قابلت كريم و عبد الرحمن ، عملنا اتجمعنا ناحية الجامعة كدا ، و طبعاً كانت قعدة لطيفة جداً ^_^
كريم كنت قابلته قبل كدا ، من الناس اللطيفة اللي اتعرفت عليه ^_^
عبد الرحمن كانت اول مرة اشوفه ، و هو برده ما شاء الله عليه ، من الناس اللي الوحد يفرح بمعرفتهم ^_^
و الاتنين ليهم اهتمام ب روبي (دي لغة برمجية مش حاجة تانية ! 
) و هي لغة ممتازة جدا و سهلة و منافس قوي لبايثون (انا بقى بتاع بايثون )
اتكلمنا في حاجات كتير ، طبعا منها لينوكس و البرمجيات الحرة و شوية حاجات عن البرمجة و حاجات تانية كتير .
كان لقاء لذيذ جدا ، و ان شاء الله يتكرر تاني ^_^
الخميس، ١٢ نوفمبر ٢٠٠٩
في
٣:٤٧ م
التسميات:
{
تبعي
}
في يوم من الأيام تستيقظ من النوم ، تجد نفسك في حالة غريبة و لا تدري ما السبب ، شعور غريب إحساس مختلف ، خليط من الأحاسيس و المشاعر ، كأنك واقع في الحب !
في الحقيقية قد لا أكون جربت فعلاً الحب بالمعنى المتعارف عليه حالياً ، و لكنه إحساس لا يشبه أي إحساس قد تكون شعرت به من قبل ، هو شعور غريب حقاً و لا تعرف ما هو !
تميل نحو شخص ما ، قد يكون شخص افتراضي و لم تراه على ارض الواقع قط و غالباً لن تراه ، و لكن تحب أن ترى ردوده و تتبع مشاركاته ، لكن ... يا ترى هل هو مهتم أيضاً ؟ هل استطيع التلميح له ؟ هل سيتقبلني ؟ و هل سيبادلني نفس المشاعر ؟
بل هل هو حب فعلاً ؟ أم أنه فقط اشتياق لهذا النوع من الحب ؟ قد اكون جربت أنواع أخرى من الحب ، حب الأهل ، حب الصديق ، حب العمل و الاخلاص فيه و حب الوطن ، لكن الشعور الحالي غريب فعلاً و قد يكون مجرد اشتياق لتجربة نوع جديد من الحب .
لكن ،،، على الشخص توظيف مشاعره في الاطار المناسب ، قد يكون الوضع الحالي صعب على كثير من الاشخاص ، نظرة المجتمع الشرقي لعلاقات الرجل ، دائماً ما نجد شكوى أن المجتمعات الشرقية تنظر للعلاقات العاطفية للشاب نظرة أقل شدة من علاقات الفتاة قبل الزواج ، لكن هل يجعل هذا الموضوع أسهل على الشباب الذين يريدون الابتعاد عن مثل هذه العلاقات و إعمال مشاعرهم في الإطار السليم ؟ ، للأسف نحن في النهاية بشر لدينا عواطف و مشاعر ، نتأثر بما حولنا و بما نراه و نسمعه ! تذهب للكلية تجد ثنائيات في كل مكان ، ترجع لمنطقتك تجد اصدقائك و معارفك يتكلمون عن علاقاتهم ، تجلس امام الكمبيوتر ترى نفس الوضع !
مشاعر مختلطة و أسئلة كثيرة ، لكن في النهاية يجب أن تكون النفس نقية لتحظى بالنقي ، و يظل الطيبيون للطيبات ، فترة و ستمضي لحالها كغيرها ، و في يوم من الايام ستصل للاستقرار عندما تجد السكن و المودة و الرحمة ، و يبدوا أنها التقلبات الجوية ليس إلا : )
-------------------
تدوينة بقالها اكتر من أسبوعين محفوظة كمسودة ،،،، أنا مش ناثر ولا ليا في الكتابة ولا حتى اعتقد اني رومانسي (معرفش بجد هل بتتكتب بالألف ولا بدونها !) و بصنف نفس على إني شخص عملي لدرجة الغباء ! ، لكنها كانت مجرد خاطرة و كنت محتاج للكتابة فعلاً : )
و ليه بعتقد ان الحاجات الغريبة دي سببها التغييرات الجوية ؟ ، عشان في نفس التوقيت ده تقريبا من السنة اللي فاتت ، كنت كتبت تدوينة زي كدا ، و كان فيها مشاعر مختلطة كتير ، بالاضافة لاني من يومين قريت تدوينة جميلة بتتكلم عن نفس الموضوع : اكتئاب الغيوم ( بس الواضح اني مش بكتئب D: ، انما بيكون تغيير من نوع مختلف)
الثلاثاء، ١٠ نوفمبر ٢٠٠٩
في
١٢:٣٨ ص
التسميات:
{
تبعي,
غباء
}
يخرب بيت القرف بتاع الكورة ده !
كمية كراهية و قرف و تعصب منتشرة اليومين دول تخلي الواحد يتشل !
انا مش عارف ليه كل ده اساسا !! كل ده على ماتش ! ولا حتى كل ده عشان الكورة !!
اساسا معروف ان كتير من متابعي و مشجعي و حتى مسئولي الكورة متعصبين مش بس في مصر ولا في الجزائر دا في العالم كله !
انا فعلا بشكر والدي من كل قلبي انه مكنش بيتابع القرف ده اللي اسمه متابعة و تشجيع الماتشات
مش فاهم يعني ، لو شوية مصريين كدا انضربوا في دماغهم و طلعوا على الفضائيات مش الجرايد المحلية حتى ، و قعدوا يشتموا في اي دولة ، هل هنلاقي الدولة دي تاني يوم باعته قوات عسكرية عشان تضرب مصر ؟ و تبقى مصر دي العدو الاول ليهم ؟
نفس الوضع ، مش معقول عشان مجموعة من الجزائريين عاملين مواضيع عن مصر و مهما كان سوء الحاجات اللي عملوها دي خلاص بقى يبقى نكره الجزائر و الجزائريين !! (و اللي عمله بعض الجزائريين مش كويس يعني ، دا منيل بستين نيله) بس اللي عمل كدا كام شخص يعني ؟ ميه ؟ الف ؟ مليون ؟ اتنين او حتى تلاته مليون ؟ الجزائر حوالي 35 مليون !! مش معقول هكره كل الشعب عشان مجموعة مجانين ! المحترم محترم و المتعصب متعصب !!
حاجة تقرف بجد !
عشان نشوف الوكسة الحقيقية يا ريت تقروا الموضوع ده من على مدونة موسوعة المعرفة
الحرب المصرية الجزائرية
مشجعين و صحافة تعبانين !!
اخيراً ، بقول لكل جزائري محترم ، انا فعلاً بقدرك بغض النظر اي حاجة تانية (و بغض النظر اذا كنت هتعرف تقرا لهجتي العامية الركيكة دي ولا ﻷ D:)
:: أُخَيَّ في الجزائر تحيتي إليك ، و هلت البشائر بنور مقلتيك ::
الثلاثاء، ٢٠ أكتوبر ٢٠٠٩
في
٦:٣٦ م
التسميات:
{
احداث و مناسبات,
تبعي
}
السلام عليكم و رحمة الله و بركاته
المفروض ده كان موضوع عن اتمامي العشرين ، لكن في الحقيقية انا تميت العشرين من خمس شهور ! - كان قبل تلات ايام من اول امتحان في الفصل الدراسي التاني لسنة تالتة - ، تميتها في 21 مايو 2009 : )
لكن كان لازم كتابة الموضوع ده : )
و بالمرة اتكلم عن اتمام المدونة سنتها الاولى - تمتها من شهرين و شوية ! -
-------------
العشرين ، يعني بداية عِقد جديد من عمري ، يعني فاضل سنة واحدة و اكون بالغ رشيد قانوناً و اكون شخصية قانونية مستقلة تماماً عن والدي ، يعني اخر سنة في الدراسة ، يعني اقرب للجيش و للحياة الاخرى ما بعد الجيش ، يعني اكثر وعياً و نضجاً ، و يعني و يعني و يعني : )
مع مرور كل سنة المفروض ان الواحد يعمل لنفسه تقييم شامل للسنة اللي عدت ، بالنسبة ليا انا سعيد جدا بالسنة اللي فاتت ، قدرت اتخلص من عدد من العيوب ، و اضيف عدد من المميزات بالاضافة الى اكتسابي المزيد من الخبرات ، و الاهم زادت ثقتي بنفسي : )
بداية السنة دي كانت غريب جدا ، هو مش نوع من التشاؤم او التطير ، انما حاجة لاحظتها فقط : )
في اول تلات ايام فيها اتكهربت ، اتصبت في ايدي بحرق بحجم عملة معدنية - من بتاعت ايام زمان مش العملات بتاعت اليومين دول D: - ، اتدلق عليا شوربة مولعة !
الغريب في الموضوع ان الحاجات دي محلصتش معايا من فترة كبيرة جداً ، من ايام ابتدائي و اعدادي بالرغم من اني مش الشخص الحذر اوي ! (تقريبا عجزت و ردت فعلي بقت بطيئة ههههههههههههه) ، بس بصراحة كان نفسي بتهفني على الكهربا ، الواحد بقاله متكهربش (اليوم اللي قبله كنت بقول في دماغي انا بقالي كتير متكهربتش ، تاني يوم راح حصل هههههههههه)
-------
لكن بما اني كملت العشرين ، محتاج اقرا اكتر في مجالات معينة : )
زي ؟ معلومات عامة عن الامراض الوراثية و الوبائية ، معلومات عن التربية - بصراحة مش ناوي عيالي تتربى حسب الظروف ! - ، محتاج اقرا في اصول الدين و العقيدة اكتر ، عاوز اراجع على قواعد اللغة العربية ، و ناوي ان شاء الله ارجع احفظ قرآن ، و بإذن الله اراجع جزء عم قبل نهاية السنة دي .
جربت قبل كدا تحفظ القرآن بالكتابة ؟ ، اعتقد ان ناس كتير بتحاول تحفظ القرآن بالقراءة ، اعتقد موضوع القراءة ده مش مناسب لناس كتير خصوصاً في عصرنا ده لان حاجات كتير بتخلي الواحد مشتت و ذهنه مش حاضر ديماً ، لكن الكتابة اكتر قدرة على تثبيت النص ، على الاقل ده بالنسبة ليا ، عشان كدا مش بعرف اذاكر غير بالكتابة ، جرب الطريقة دي ممكن تكون مناسبة ليك : )
و لسه في احاجات كتير عاوز اعملها بإذن الله : )
---------------------
بالرغم من مرور اكتر من سنة على المدونة ، مازلت صفحة "عن skeleton eel اتحدث" ، لسه فاضية ، اعتقد اني هرجع اعدلها في الكام يوم دول .
كنت عاوز اكتب كام حاجة كمان ، بس نسيت ! فكفاية كدا دلوقتي : )
الخميس، ١٥ أكتوبر ٢٠٠٩
في
٤:٥٨ ص
التسميات:
{
برامج حرة/مفتوحة المصدر,
تبعي,
تصميم
}
الجمعة، ٢٨ أغسطس ٢٠٠٩
في
٢:١١ م
التسميات:
{
برامج حرة/مفتوحة المصدر,
تبعي,
من هنا و هناك
}
السلام عليكم و رحمة الله و بركاته
تدوينة ثلاثية على السريع D:ـ-----------
# Uget Download Manager .
اول الاسبوع اللي فات انضميت لمشروع Uget - صفحة المشروع على سورس فورج - ، برنامج يو جت مدير تحميل جميل جدا ، بسيط و خفيف و فيه مميزات جميلة جدا و كمان حر و مفتوح المصدر ، و الاجمل انه مكتوب بـ GTK+ ، يعني بيستخدم نفس المكتبات المستخدمة في جنوم - الواجهة الرسمية لعدد من نوزيعات جنو/لينوكس المشهورة زي اوبنتو ، فيدورا ، دبيان ، ريد هات و غيرهم -طبعا انا مش مبرمج و مليش في البرمجة - بغض النظر عن شوية باش سكربتنج على شوية بايثون - ، لكن مين قال عشان تساهم في البرمجيات الحرة لازم تكون مبرمج ؟ : )ممكن تساعد باي شكل من الاشكال ، اي طريقة متاحة ليك ساعد بيها ، اكيد مجهودك ده هيستفاد منه ناس كتير : )مطور البرنامج "Raymond Huang" و معروف على الانترنت باسم plushuang ، الوضع الحالي هو هيهتم بالبرنامج نفسه من ناحية البرمجة ، و انا ههتم بالحاجات التانية المتعلقة بالبرنامج ، او حاجة عملتها ، عمل شعار جديد للبرنامج لان الشعار القديم مكنش ليه دلالة تقريبا ! ، و برده مش انا اللي عملت الشعار ، انا بس نظمت موضوع لجمع الافكار لشعار البرنامج ، و شاركت ببعض الافكار من ضمنها الفكرة الحالية للتصميم ، انما التصميم كان الاخ الفاضل صفوان المعروف باسم saf1 - ما شاء الله عليه عنده حس فني جميل جدا -و ده الشعار اللي توصلنا اليه
ونفس التصميم مع بعض التعديلات 
اضغط على الصورة للتكبير
----------------------------
# مقابلة شخصية لوظيفة .من يومين ، روحت عشان المقابلة الشخصية (interview) عشان شغل دعم فني في شركة كمبيوتر بتاعت استضافة و حاجات زي كدا ، كانت تجربة مفيدة جدا بالنسبة ليا ، بالرغم ان المقابلة مكانتش زي ما انا عاوز ، انما نظراً لان دي تقريبا اول مقابلة شخصية لوظيفة ، استفدت من حاجات كتيرة ، و اخدت بالي من كذا نقطة مهمة .اتصال الشركة كان بناء على ترشيح احد المعارف اللي شغالين في الشركة ليا ، لشغل الوظيفة - طبعا كنت بعت الـ cv بتاعي قبل ما اروح -و لاني معرفش مكان الشركة تحديدا ، اول حاجة عملتها بعد اتصال الشركة بيا ، اني روحت لويكي مابيا و بحثت على اسم الشارع اللي فيه الشركة و بعض المعالم المحيطة بيها ، و قدرت اوصل لمقر الشركة بالظبط و ده ساعدني اني اقدر اوصل بسهولة من غير ما اتوه في الطريق ، موقع ويكي مابيا WikiMapia هو موقع خرائط تشاركي ، بنفس نظام الويكي ، اي شخص ممكن يشارك فيه و يضيف اسم مكان هو يعرفه او اسم شارع او اي مَعْلم تاني ، فعلا استفدت من الموقع ده كتير ، و من وقت للتاني بشارك فيه بإضافة اسماء الاماكن و الشوارع اللي اعرفها .وصلت للشركة بسلام و الحمد لله ، و لقيت واحد صاحبي كنت متوقع الاقيه لاننا تقريبا نفس المستوى في المعرفة ، و لاننا برده نعرف نفس الشخص اللي رشحنا للشغل ده D:الرخم في الموضوع ان اليوم ده شعري مكنش ليه مزاج يتسرح !! D: ، جيبته في جميع الاتجاهات و مش عاوز يتسرح كويس برده !! ، في الحالات اللي زي دي كنت بلبس عليه كاب و خلاص - سكلتون و الكاب الاحمر علامة مسجلة D: - ، بس اكيد مش هروح مقابلة شخصية و انا لابس كاب يعني ! ، في الاخر سرحته اي حاجة و نزلت D:
المهم ، قعدنا حوالي 10 دقايق ، بعدين هو دخل الاول لانه كان موجود الاول ، بعد ما خرج دخلت انا : )من قبل ما اروح اساسا و انا عارف ان امكانية اني اشتغل في مكان بدوام كامل قليلة جدا ، و ده بسبب ظروف الدراسة - ده بغض النظر عن موضوع الجيش يعني - ، لاني باخد اجازة من كل حاجة و حتى الكمبيوتر في البيت ، لمدة شهرين او شهرين و نص كل تيرم !! ، يعني على اقصى تقدير لو اشتغلت من اول الاجازة اكتر مدة متوصالة هقدر اشتغلها هى خمس شهور بس !!لكن مع ذلك كنت واخد الموضوع بكل جدية ، لاني اكيد هطلع بحاجة مفيدة من التجربة دي حتى لو مشتغلتش ، و حتى حاجات مفيدة على المستوى الاجتماعي ، زي تقبل فكرة الرفض ، و انهم مش هيرفضوك عشان شخصك انما هيرفضوك عشان انت مش مناسب للوظيفة دي تحديدا - ان شاء الله قريب ناوي اكتب موضوع عن "الخوف من الرفض" : ) -المقابلة نفسها كان لطيفة جدا ، و مفهاش اي توتر ، و في الاول سأل اسئلة عادية زي ساكن فين ، بتدرس ايه ، مجموعك ، بتحضر محاضرات الجامعة ولا ﻷ - طبعا السؤال ده ليه علاقة بالشغل بشكل عام - ، و شوية حاجات تانية كدا .قبل ما اروح محضرتش اي كلام عشان اقوله ، و كنت متوقع انه هيسأل على حاجات معينة ، لكن اللي حصل انه مسألش على حاجة بعينها ، و قالي اتكلم عن الحاجات اللي تعرفها ! ، و ده خلاني مش مرتبك انما مكنش في حاجة معينة في دماغي ، فكنت بحاول افتكر كذا حاجة اعرفها و كذا حاجة اتعاملت فيها ، بس برده مقدرتش اقول كل حاجة - منها حاجات مهمة و ليها صلة بالشغل ! -اللي فهمته من جزء ده انك ببساطة المفروض تكون رايح المقابلة عشان تتفاخر ، مش التفاخر في معناه السيء ، انما مفيش مجال للتواضع او تهميش اي شيء انت عملته ، قول كل حاجة كبيرة و صغيرة انت عملتها او جربتها سواء كانت مرتبطة بالوظيفة بشكل مباشر او غير مباشر .طبعا مش محتاج اتكلم عن الثقة بالنفس ، ممكن تكون متوتر نوعاً ما و ده شيء طبيعي خصوصاً اذا كانت المقابلات الاولى او وظيفة مهمة بالنسبة ليك ، لكن اكيد من اهم الاشياء انك تكون واثق من نفسك بشكل كويس : )كان من ضمن الاسئلة ، سؤال عن مدة الاجازة اللي ممكن تاخدها خلال السنة ، قلته بكل وضوح و بدون اي تلاعب ، ان الامتحانات لوحدها بتاخد حوالي شهر كل تيرم ، و انا بحتاج شهر او شهر و شوية قبل كل امتحانات عشان اعرف اذاكر بشكل كويس ، يعني المجموع اربع شهور !! ، تقريباً هو تفاجئ بحاجة زي كدا و لسان حاله بيقول ازاي هتشتغل كدا D: ، ف زي ما قولت في الاول ، انا متوقع ان نسبتي قليلة جدا الحصول على الشغل ده - على الاقل بدوام كامل - بسبب موضوع الدراسة ، و خصوصاً ان السنة اللي جاية دي الرابعة و الاخيرة و لازم اركز فيها كويس جدا ، و بعد كدا لما اخلص ابقى اعمل اللي انا عاوزه : )في حاجات تانية كنت اعوز اكتبها بس نسيتها !! ، لو افتكرتها هبقى ارجع اعدل التدوينة : ) ----------------------------
# حملة "أوقف العادة السرية" .بغض النظر عن اني فعلا مش بحب كلمة "حملة" ! ، لان كل شوية تلاقي كام واحد عاملك "حملة" عن مش عارف ايه كدا !المهم ، محمود و المعروف بإسم "محب سينين" ، عامل موضوع جميل عن العادة السرية ، و اضراها و ادلة تحريمها و معلومات عنها .يمكن الموضوع بالنسبة ليا مش جديد تمامأً ، لاني قبل كدا عملت بحث مكثف عن كل ما يتعلق بالعادة السرية على سبيل العلم بالشيء .تعليقي على الموضوع ، هتلاقي مواضيع و ابحاث علمية بتقول ان الموضوع مش مضر و مفيد كمان ! (كل او اغلب الابحاث العلمية بتتكلم عن القيام بيها بدون افراط ) و حتى اراء فقهية بتقول ان العادة السرية هى فقط مكروهه ، او مباحة عند الضرورة فقط ,او حتى مستحبة ! ( مفيش رأي فقهي بيقول باستحبابها ، هى مباحة عن الضرورة فقط ، عذرا غلطة مني ) .
الموضوع فيه كلام كتير و ز ما قولت في كذا رأي فقهي في الموضوع زي مثلاً انها مباحة عند الخوف من الوقوع في الزنا - الخوف من الوقوع في الزنا لازم طبعا يكون مبني على اسباب جدية و حقيقية ، مش مجرد ان واحد يشوف واحده غير محتشمه في الشارع يقول انا خايف اقع في الزنا ! - ، و كمان في اشياء ليها فوائد و لكن فوائدها لا تقارن بأضرارها !!لكن اللي انا متأكد منه انه مش من المعقول نحط النار جنب البنزين و نقول يمكن متحصلش حريقة !!العادة السرية زي الادمان بالظبط ، مش هينفع اقول الهروين لو اتاخد على جرعات تقليلة بشكل متباعد مش هيعمل حاجة بل مفيد كمان !! ، لما بتاخد جرعة في التانية في التالتة مش هتقدر تمنع نفسك ، و اي واحد بحث عن الموضوع ده اكيد هيكون عارف ان في ناس بتفضل تمارسها حتى بعد الجواز !!!! ، يعني غالبا الوضوع بيتحول لادمان في الاخر !
المهم يعني ، اقروا الموضوع ، و برده ابحثوا عن الاراء التانية اللي بتتكلم عن نفس الموضوع عشان تكونوا عندكم فكرة كاملة : )و زي ما بيقول في بداية الموضوعمن الواقع المر الذى نعيشه والذى لا ينبغى السكوت عنه بسبب الحياء وبسبب المشكلات التى تسببها تلك الممارسة الممقوتة كان يجب الكتابة عنها وبيان مخاطرها وأضرارها فليس من المفترض أن يمنع الحياء الخير
مش عارف ليه الكلام عن الموضوع ده بالذات بيفكرني بموضوع "حزام العفة" (chastity belt) ، و ادوات منع الاستمناء" عند الرجال (male anti masturbation device) !! ، ادوات كانت بتستخدم من القرن الـ 15 الى اواخر القرن 18 في اوربا - مفيش روابط ، لان كل الروابط اللي بتتكلم عنها ملغومة ! -
الاثنين، ١٧ أغسطس ٢٠٠٩
في
٤:٥٤ م
التسميات:
{
اعمال تطوعية,
تبعي,
رسم
}
السلام عليكم و رحمة الله و بركاته
الاسبوع اللي فات كان اسبوع جميل جدا ، كنت مسافر مع العائلة للتصييف و الاستجمام D:
على المستوى العائلي ، تقريبا بقالنا اكتر من اربع سنين مروحناش مصيف مع بعض ! ، لاسباب كتيرة سواء عائلية اجتماعية او حتى ميكانيكة ، لانننا مش متعودين على المواصلات في السفر و كان اعتمادنا بشكل كامل على العربية ، و العربية كانت - و ما زالت - بعافية شوية D: ، بصراحة عن نفسي بفضل الجو العائلي عن الرحلات الشبابية ، بس برده من وقت للتاني بيكون شيء كويس ان الواحد يروح مع اصحابه في رحلة - و لكل واحد فيهم مميزاته و عيوبه : ) -
دي فعليا المرة الاولى اللي اروح فيها الاسكندرية ، بغض النظر عن اني روحت السنة اللي فاتت يومين مع واحد صاحبي ، انا شخصياً كنت مخنوق من المذاكرة ، عمال اذاكر بقالي كتير و كتب مش عاوزة تخلص !! ، انا و واحد صاحبي ضربت في دماغنا نروح اسكندرية ننزل البحر ! ، و فعلا تقريبا معملناش اي حاجة غير اننا نزلنا البحر ، و مروحناش في مكان يذكر !
اللطيف في الموضوع بقى ان الاسبوع ده كان متظبط بطريقة ممتازة ، كان بالنسبة ليا مثالي اكتر من اللازم ! - و فعلا الاسبوع مكتملش بشكله المثالي ! -
يعني ، هروح البحر اصييف و استمتع مع العائلة ، و كمان في نفس الوقت كذا واحد من اصحابي كانوا في الاسكندرية ، و قضيت معاهم يوم ، و كمان كلمت ناس اعرفهم من منتدى مجتمع لينوكس العربي ، بيستخدموا نظام جنو/لينوكس ، و قابلتهم و كانت قعدة لذيذة فعلا ، مع اني اتفقت معاهم في مكان ممنوع الوقوف فيه اساسا هههههههههه - ان واحد منهم يعترض على المكان ولا يقول ايه حاجة ، مفيش D: - ، لكن كذا واحد عرف يوصل ، ده بغض النظر عن الناس اللي اعتذرت بعد ما تأكيد حضورهم - الشعب المصري هو الشعب المصري ، في حكاية المواعيد دي ميتواصش هههههه - ، شويه كدا و هروح اشردلهم على المنتدى D: - و كان في رحلة للبحر نظمتها جمعية الروان الخيرية ، و حضرت معاهم من اول اليوم لاخره ^_^ ، و كمان كنت هقابل ناس كانوا جيرانا من زماااااان جدا - اكتر من 20 سنة ، انا فعليا عشت معاهم فترة من طفولتي : ) - ، ولكن للاسف زي ما قولت الوضع كان مثالي اكتر من اللازم ، و يوم ما جيت اعدي عليهم ، لقيتهم مسافرين مطروح لمدة اسبوع ! و معرفتش اشوفهم حتى - بتوع اسكندرية دول بيدلعوا على فكره ! ، يوم ما يصيفوا بيروحوا سيناء ، او مطروح D: -
لكن في المجمل كان اسبوع جميييل جدا ، و استمتعت على الاخر ^_^
--------------
نزلنا - انا و العائلة - في شاطئ النخيل (منطقة العجمي) ، العجمي منطقة غرب الاسكندرية ، عند الكيلو 21 تقريبا ، عشان كدا الاحياء و الشاطئ اهدى بكتير من الاسكندرية نفسها ، و كنا قريبين من البحر بنشوف البحر من البلكونة - اساسا عرض المنطقة مش كبير اوي - ، اول يومين مية البحر كانت ممتازة جدا و صافية ، بس للاسف بعد كدا المية بقت مليانة شوائب كتير - نباتات بحرية - ، و رجعت بقت كويسة على اخر الاسبوع ، و لحسن الحظ اننا مروحناش الكام يوم دول ، انا بس عديت على المية و بعد ما نزلت شوية ، لقيت الموضوع مش نافع خالص .
بس انا مكنتش عاتق البحر يعني ، تقريبا نزلت المية خمس ايام و نص من اصل سبعة D: ، النتيجة طبعا اسمرار شديد ، و جلدي اتقشر على نطاق واسع D: ، بس بجد بقالي كتير محستش بالاحساس ده - بما اني من ذوي البشرات البرونزية موضوع التعرض للشمس و تقشر الجلد ده مش مؤلم اوي -
بس الرخم في الشواطئ اللي فيها ناس بشكل دائم ، ان مفهاش كائنات بحرية كتير ! ، يعني في المكان اللي كنت فيه مكنش في غير سمك صغير بيسموه شراغيش (المفرد شرغوش) ، يعني كان نفسي الاقي اي كائنات تانية ، مثلا كابوريا / سلطعونات ، نجوم بحر ، قناديل ، او حتى اي كائن تاني غير السمك !! ، السنة اللي فاتت روحت رحلة للبحر في راس سدر ، و مسكت كابوريا ، و نجمتين بحر ، و كان في بلح بحر و حلزونات بحرية كمان ، بس رجعتهم تاني للمية : )
المهم بعد بحث سريع على الانترنت ، عرفت بالظبط ايه هى الشراغيش دي ، انا لقيت اسمين بس تقريبا هما الاتنين نفس المعنى الفرق في اللغة او المنطقة او حاجة زي كدا
Diplodus sargus cadenati - Moroccan white seabream
و ده موضوع في منتدى ، واحد عامله - اسمه الرمزي في المنتدى على نفس اسم السمك ده D: - ، و بيتكم على عن انواع السمك في الاسكندرية ، و منهم الشراغيش - الموضوع جميل جدا و فيه معلومات حلوة -
@@ طرق صيد الاسماك في الاسكندرية @@ ، الجزء الخاص بالشراغيش .
و دي صورة للسمكة - بس اللي شوفتهم اصغر من كدا -
الصورة من FishBase.org
اضغط على الصورة للتكبير
------------
- مقابلة لينوكساوية :
في اليوم الرابع ، على المغرب تقريبا ، قابلت بعض الناس اللي كلمتهم ، كانت قعدة ممتعة جدا ، بعد ما اتعرفنا على بعض ، قعدنا على سور الكورنيش و عيشنا ، قعدنا نتكلم في حاجات كتير جدا ، اغلبها عن الكمبيوتر ، جنو/لينوكس ، البرمجيات الحرة و المفتوحة المصدر ، و حاجات تانية كتير ^_^ ، من اللطيف ان الواحد يتعرف على ناس على ارض الواقع ، و خصوصاً الناس المشتركين معاه في نفس الاهتمامات : )
-----------
- يوم مع الايتام :
جمعية الروان الخيرية ، نظمت يوم على شاطئ الاسكندرية للاطفال الايتام ، و طبعا كانوا محتاجين عدد من المتطوعين للاشراف و التنظيم في اليوم ده ، انا كدا كدا كنت ناوي اشارك معاهم و اطلع معاهم من القاهرة ، لكن بما ان اليوم ده كنت في الاسكندرية ف روحت على مقر الجمعية على طول ، و الشكر لمواقع الخرائط زي WikiMapia.org ، اللي عن طريقه عرفت اوصل لمقر الجمعية في الاسكندرية بكل سهولة مع اني عمري ما روحته قبل كدا .
اليوم ده برده كان جميل جدا ، الاطفال لعبت و استمتعت بالبحر ، و انا شاركت في التنظيم و استمتعت ، اتعرفت على ناس جديدة ، و شوفت ناس بقالي كتير مشفتهمش ، يعني استفادة و استمتاع من كل النواحي : )
و الحمد لله مفيش حد تاه ولا حصله حاجة D:
------------
- مقابلة لم تتم :
الشيء المحبط في الاسبوع ، كنت مخطط لمقابلة ناس جيرانا من زمااااان جدا ، بس للاسف ، مكلمتهمش اول ما وصلت الاسكندرية ، و لما اتصلت بيهم ، لقيتهم مسافريين يصيفيوا ، اسبوع في مرسى مطروح - ما البحر جنبهم و خلاص D: - ، في الحقيقة الغلط مني ، المفروض اني كنت اكلمهم اول ما اوصل ، بس مجاش في بالي اي تأخير ممكن يوصل لمدة اسبوع !
شعور غريب انك تقابل حد مشفتهوش من 15 سنة - انا اساسا عمري كله 20 سنه ! ، يعني اتربيت معاهم فترة و اوعى ليهم - ، يا ترى بقوا عاملين ازاي ؟ ، و احوالهم ايه ؟ ايه التغير و ايه اللي فضل ثابت ؟ ، حاجات كتير بتيجي في دماغ الواحد : )
---------------------------------
بعد الاسبوع ما خلص رجعت يوم السبت بلييييل خالص على 12 او 1 ، بس فعلا زي ما بيقولوا
no place like a home
: )
----------
# ملحوظة على جنب : الرسمة اللي في اول الموضوع ، كانت واحده من محاولاتي لرسم شخصية لطيفة و التعديل على ملامحها ، الشخصية هى "سلمى" من بنين و بنات ، على موقع اسلام ويب .
موقع بنين و بنات بيقدم معلومات و ارشادات اسلامية للاطفال بطريقة جميلة جدا و تفاعلية باستخدام الفلاش و المؤثرات الصوتية ، اخواتي الصغييرين بيحبوا الموقع و الشخصيات اللي فيه جدا ^_^
بالنسبة للرسمة ، كنت بحاول اعمل شوية تغييرات في ملامح الشخصية ، بجرب كذا اسلوب عشان كدا الصورة مش متقنة اوي - زاوية الايد المرفوعة مش مظبوطة خالص - و مش شبه الشخصية الاصلية اوي - بس بالنسبة ليا ما زالت لطيفة - ، و دي الصورة الوحيدة المتاحة على الكمبيوتر حاليا : )
السبت، ٨ أغسطس ٢٠٠٩
في
٣:٥١ ص
التسميات:
{
الكلية و الدراسة,
تبعي
}
السلام عليكم و رحمة الله و بركاته
اخيرا النتيجة بتاعتي ظهرت ^_^ ، مع اننا من اواخر الكليات اللي بتظهر تقريبا ، لكن حاليا مفيش غير نتيجة تانية "ب" ، و تالته "أ" - اللي انا فيها - ، احنا اول نتيجة تظهر ، تقريبا بيطيبوا خاطرنا عشان كنا اخر نتيجة تطلع التيرم الاول D:
النتيجة التيرم ده احسن بكتير من التيرم الاول - اي تيرم مفهوش قانون دولي بيكون كويس هههههههههه - ، جبت جيد جدا الا 6 درجات ، معلش خلوني افرح بكلمة جيد جدا ، كنت عاوز جيد جدا ، بس الحمد لله ^_^ - اصل جيد جدا في حقوق القاهرة دي يعني شخص متفوق D: -
مع نتيجة التيرم الاول ، النتيجة الكلية جيد مرتفع - فعليا مفيش حاجة اسمها جيد مرتفع ، ده مصطلح عرفي تعارف عليه الطلاب ، لان الفرق بين الجيد و الجيد جدا اكبر من الفرق بين اي تقديرين -
ده بغض النظر عن مادة القانون الدولي الخاص اللي شايلها من التيرم الاول D:
الحمد لله ^_^
--------------
السنة دي كانت غريبة شوية - كذا حاجة بتأثر على المجموع و التقدير يعني - ، بغض النظر عن القانون الدولي ، اللي مش عارف ماله بيا ، منظمات دولية اولى ، نزلت فيها ، بس عديت بدرجات الرأفة .
دولي عام تانية ، نزلت فيه نزله سودا يعني D: ، بس خلصت منه في تالته ، اسوأ درجة جبتها في الكلية لحد دلوقتي D:
دولي خاص تالتة ، كلنا بقى نزلنا فيه ، اغلب الدفعة شايله المادة ، الدكتور اللي بيدرس المادة ليه نظام معين ، و عاوز اجابة بشكل معين ، بصراحة الدكتور محترم جدا ، و من العقليات الجامدة جدا حاجة ما شاء الله ، بس في جزئية الامتحانات و الاجابة دي ، عاوز طلبة دكتوراه عشان يجاوبوا D:
مع اني فاهم موضوع المادة بشكل كويس جدا و الحمد لله ، بس مش عارف ليه المادة دي معلقة معايا >_<
اصل حاجة رخمة ابقى جايب جيد و جيد جدا في كل المواد و انزل خالص في مادة !
التيرم عموما بيكون فيه 5 مواد و كل مادة غالبا بتكون من كتابين كبار ما شاء الله يعني ، و ساعات تلاته ، الغريب بقى في السنة دي ، التيرم الاول مادة قانون العمل ، الامتحان كان طوييييييل جدا - معلش برده ، الكتاب بتاعه اكتر من 1000 صفحة ، الامتحان هيكون ازاي ؟ - ، و بالنسبة لواحد بطيء في الكتابة نوعا ما زيي ، ملحقتش احل الامتحان ، مع ان الامتحان كويس جدا يعني و عارفه ! انا مش بيجنني قد حاجتين ، الوقت يخلص قبل ما اخلص الاجابة و انا عارف الاجابة ! ، و الحاجة التانية ان كراسة الاجابة نفسها تخلص ، و لسه عندك حاجات تتكتب ! - ده طبعا على حسب نوعية الاسئلة ، لان في اسئلة ما شاء الله بتكون ملياااااانه ! - المهم يعني ، المادة دي جبت فيها 8 من 20 ، و الحمد لله اترفعت بدرجتين رأفه - للطالب 4 درجات رأفة في السنة كلها -
------------
نيجي بقى للتيرم التاني ، التيرم ده جميل جدا بالنسبة ليا ، مع ان ناس كتير بتخاف منه عشان فيه جنائي عملي ، و مواريث و وصية ( شريعة اسلامية - علم الفرائض و الوصية ) ، انا بقى اموت في العملي D: اعتقد اللي عنده خلفية عن تقسيم المواريث و تقسيم التركات هيكون عارف التداخلات اللي بتكون موجودة في موضوع الفرائض، مثلا يقولك "ماتت عن زوج و بنت ابن و ابن ابن مخالف للدين و جد و اخ شقيق واخ لاب وعم شقيق" ، الاول بتشوف مين اللي بتحجب ، بعد كدا بتشوف موضوع الدين ، مخالفة الدين في المواريث بتمنع التوارث ، انما في الوصية تجوز لغير المسلم ، و مسألة زي دي غالبا بتتحل على مرتين ، المفروض تشوف التقسيمة الافضل للجد ، هل هى السدس ولا هيشارك الاخ الشقيق ؟ ، ده مثال صغير و سريع : )
المهم يعني ، امتحان الشريعة ، بيكون فيه 10 درجات عملي ، مسألتين مواريث ، و مسألتين وصية ، كل واحدة عليها 2.5
جه سؤال عملي في المواريث ، في اخره فيه كسور !! ، تقريبا كل الطلبة واخدين على المسائل اللي مفهاش كسور - كلها اعداد صحيحة يعني - ، مفيش ولا امتحان على مر الكلية جه و فيه كسور في الاخر ! ، يعني الطلبة اساسا خايفين من المادة لوحدها كدا ، يروح الدكتور يجيبلهم كسور في المسألة ههههههههه - المفروض ان الدكتور لما بيحط المسألة بيظبط مقدار التركة عشان ميطلعش فيه كسور في الاخر ، و كل الطلاب حاطيين معييار موحد ، ان لو في كسر في المسألة يبقى المسألة غلط ، مع ان في الحياة العملية وارد جدا يكون في كسور ! - طبعا في طريقة لتصحيح اصل المسألة عشان تشيل الكسر ، بس ساعات التركة نفسها مش بتكون قابلة للقسمة على اصل المسألة ، و لو قسمتها ، هيطلعلك كسور اكتر ههههههههه -
المشكلة مش في كدا ، المشكلة الحقيقية ، ان الطلاب كلهم بلموا قصاد المسألة ، و في ناس شكت في نفسها و قعدت تجرب تحجب ناس مش بتتحجب اساسا ، و تورث ناس مش بتورث ، و برده في الاخر المسألة مش عاوزه تتعدل D:
في الرياضيات كانوا دايما يقولونا و احنا صغييرين ، حل المسألة للاخر ، و بعد كدا عيد عليها من الاول ، و حتى لو الناتج النهائي طلع غلط ، على الاقل هتاخد اي درجة على الخطوات طالما صح ، هما بقى قعدوا في اول خطوة و وقفوا فيها ، ولا كملوا الخطوات عشان ياخدوا نص الدرجة ، و لا ركزوا على بقية الامتحان - الامتحان مكانش قصير ، و كان عاوز وقت ! - ، ف ناس كتير اتظبتط يعني :s
انا بقى في كسر ولا مفيش كسر هحل المسألة يعني هحلها هههههههههه ، المشكلة اللي الناس كانوا متلخبطين فيها ، في اخر المسألة بيبقى اخ و اخت ، و ليهم 35 فدان ، و زي ما معروف للذكر مثل حظ الانثيين ، و بالتالي المفروض ان الـ 35 تتقسم على 3 - و اصل المسألة مكنش ينفع يتصصح ، لان زي ما قولت ، مقدار التركة نفسها مش بتكون قابلة للقسمة على اصل المسألة ، و لو اتقسمت بيكون فيها كسور اكتر ! - ، انا بقى عملت الخطوات و جبتله حل كمان ،35 فدان على تلات رؤوس ، يبقى لكل فرد 11 و 2/3 - تلتين فدان - ، يبقى الاخ هياخد 22 فدان و 6/4 فدان - فدان و تلت يعني - ، و البنت هتاخد 11 فدان و 2/3
اللطيف في الموضوع بقى ، ان عقلي الغبي لسه بيحاول يفكر على التوازي !! ، كنت بحل المسألة اللي بعدها و كنت في نفس الوقت بفكر في المسألة اللي فاتت دي !! ، و طبعا زي ما احنا عارفين ، صاحب بالين كداب ، و صاحب تلاته منافق و عاوز ضرب الدِزَمْ ههههههههه
النتيجة ، اني غلط في المسألة السهلة و حليت المسألة الصعبة !! - و مش أي مسألة ، دي مسألة عليها 2.5 و مضمونة ! -
بس الحمد لله جبت فيها 16 من 20 - جيد جدا - ، بالنظر الى ان في درجتين و نص طايرين في مسألة سهلة و عارف حلها ، فده معناه اني ناقص درجة و نص بس في النظري ^_^
كنت عاوز اعمل كام موضوع عن اسس علم الفرائض و اهميته ، كنت عاوز استأذن الدكتور عشان اقتبس من كتابه شوية حاجات كدا ، بس الموضوع مكنش هينفع في الصيف خالص : )
اكيد الفروض نفسها عاوز حفظ ، و تعرف كل واحد بياخد ايه و امتى ، بس الحفظ لوحده مينفعش ، ولا حتى في كلية نظرية زي حقوق ، و لازم تفهم ، و تربط بين الاجزاء اللي اتعلمتها و حفظتها ، و عشان كدا للاسف طلاب كتير بتخاف من مواد زي المواريث و علم الفرائض .
---------------
بس الحمد لله السنة عدت على خير بحلوها و مرها ، و ربنا يستر علينا في سنة رابعة ، دي فعلا اهم سنة ، لانها دسمة جدا ، و بيكون فيها الخلاصة بتاعت الكلية : )
-------
# ملحوظة لنفسي : انا بقيت رغاي اوي D:
الأحد، ٥ يوليو ٢٠٠٩
في
٣:٥٧ م
التسميات:
{
تبعي,
معلومات عامة
}
السلام عليكم و رحمة الله و بركاته
توضيح سريع كدا ، عشان كنت كتبت في الموضوع ده "من هنا و هناك 1" ، عن رسمة البطريق اللي رسمتها ، كنت بتكلم على البطاريق اللي بتعيش في المناطق البارده و التلجية ، انما البطاريق بتعيش في كذا مكان من العالم ، و في مناطق مش بارده خالص !
African Penguin - wikipedia
البطاريق الافريقية دي بتعيش في جنوب و جنوب غرب افريقيا ، يعني اماكن حر فعلا D:
ده بس توضيح سريع كدا عشان في ناس كتير البطاريق عندهم مرتبطه بالتلج و الاماكن البارده : )
الثلاثاء، ٣٠ يونيو ٢٠٠٩
في
٦:١٤ ص
التسميات:
{
تبعي,
رسم,
من هنا و هناك,
mp3/mp4/pmp
}
الأحد، ٢٨ يونيو ٢٠٠٩
في
٩:٠٩ ص
التسميات:
{
تبعي
}
السلام عليكم و رحمة الله و بركاته
اعتقد ان ناس كتير سمعت بخبر موت مايكل جاسكون من يومين ، و برده اعتقد ان ناس سمعت عن الضغط الكبير على عدد من المواقع زي تويتر و المواقع الاجتماعية زي الفيس بوك و كمان مواقع البحث زي جوجل !!
بغض النظر عن مايكل جاسكون نفسه كمغني ، كان ليه معايا حكاية و انا صغير شوية : )
ده رد كتبته في منتدى ، بيوضح قصدي : )
#############################
لسه قاري الخبر من ساعة تقريبا ، ، ، ياااه ، مايكل جاكسون مات : )
بغض النظر اذا كان اسلم فعلا ولا مأسلمش - بحسب ويكي بيديا هو مأكدش الموضوع ده - ، و بالنسبة للفيديو حتى لو حقيقي ، برامج النميمة الامريكية دي محدش ياخد منها معلومة ، لانها اساسا بتعتمد على الاشاعات و الكلام على المشاهيير : )
مايكل جاكسون كان ليه مواضيع كتير في نص التسعينات - في الحقيقة هى كانت نهاية نهاية الكلام عنه -
طبعا مايكل جاكسون مسلمش على المستوى المصري ، كان دايما مجال واسع للاشاعات ، كنت دايما و انا صغير اسمع كلام عنه و اللي كانت في شكل اشاعات ، اللي يقولك ده خنثى ، و اللي يقولك ده بقى ست ، و اللي يقولك دا غير لون جلده بمزاجه ، و اشاعات كتير بالشكل ده ، يمكن مكنتش مهتم بمايكل جاسكون نفسه او بأخباره - مع ان كان ليه لعبة على جهاز السيجا و كانت حلوة فعلا D: - ، انما ديما بتلاقي صوت في عقلك - حتى و انت صغير في السن - بيقولك ان الكلام ده مش منطقي ، وحتى لو حقيقي ، ايه الفايدة منه ؟
كنت ديما لما حد يقولي كلام عنه ، اقوله انت جبت الكلام ده منين ، و ايه الدليل و الكلام ده ، طبعا مكنش في اي رد ، مجرد اطفال بتردد الكلام ، و اهو كلام بيتقال و خلاص ، يعني مجرد "ثرثرة" : )
انما برده لما كبرت شوية ، تقريبا في المرحلة الاعدادية كنت مهتم اعرف مدى صحة الاشاعات دي ، و الى اي مدى احنا بننقل الكلام من غير ما نفكر فيه سواء كانا اطفال صغيرة ، او شباب ، او حتى كبار !
اتفرجت على فلمين وثائقين عن مايكل جاكسون - واحد منهم مكنش فيلم وثائقي فعلا ، هو كان شو ، راجل بيحاور مايكل جاكسون ، و بيعرضوا معلومات عن حياته - ، و كانوا بيحكوا قصة حياته و الحاجات اللي حصلته ، و انه اساسا كان اسود ، بس بسبب مرض - حاجة زي البهاق كدا - ، بدأ لون جلده يروح خالص ، و كان بيستخدم كريمات على كل جسمه ، ده غير العمليات اللي عملها ، و المشاكل و الفضايح - او اللي مفروض انها فضايح يعني - و حاجات كتير عن حياته يعني ، بس فعلا حياته كانت غريبه جدا : ) ،،، في الاخر عرفت مدى تداولنا للاشاعات و مدى تحريفنا للكلام حتى لو كان صح !
------------------------
## صورة ##
بس يا ترى اللي كان بيترق و عمل الصورة دي كان عارف ان مايكل جاكسون مش هيعيش لحد 2010 ؟ اكيد لأ ، و ده يخلينا نتعظ اكتر حتى
عموما ، ربنا يرحمه و يغفر له اذا كان اسلم بجد ، اهو برده عبره للاتعاظ ، و بأي حال من الاحوال "لا شماته في الموت" : )
و على فكرة ، في امريكا ، الدنيا مقلوبه على الموضوع ده ، و تويتر ، و المواقع الاجتماعية ، و حتى مواقع البحث زي جوجل و بينج ، عليهم ضغط كبييييير جدا لدرجة انهم بيتوقفوا عن الاستجابة من كتر الضغط : )
#############################
* الفيديو اللي بيتكلموا عليه اهه
http://www.youtube.com/watch?v=zvLLG5Ne35Q
* و لو حد عمل سيرش على كلمات نشيد give thanks to allah بتاع Zain Bhikha ، هيلاقي موضوع منسوخ في كذا منتدى و بيقولوا ان النشيد ده بتاع مايكل جاكسون لما اسلم !! ، انا متابع لكل اناشيد زين بيكا تقريبا و بالتالي عرفت النشيد من كلماته على طول و انه مش بتاع مايكل جاسكون خالص يعني !
الجمعة، ٢٦ يونيو ٢٠٠٩
في
١٢:٣٥ ص
التسميات:
{
تبعي
}
السلام عليكم و رحمة الله و بركاته
ادي اول اسبوع بعد نهاية الامتحانات خلص ، و ما زال عندي شوية اكتئاب ، شكله كدا من اثار الامتحانات ! - بقالي اكتر من شهر فحت و ردم ! -
في حاجات كتير ناوي اعملها ان شاء الله ، بس مليش نفس لأي حاجة خالص ، ولا حتى القعاد على الكمبيوتر !
مش عارف في ايه بالظبط ، بس حاسس اني مخنوق من كل حاجة !
و ما شاء الله الاجازة شكلها مبشرة يعني !
مش عارف ايه النظام ده ، الواحد يقعد على الكمبيوتر في الدراسة يلاقي اهله يقولوله قوم ذاكر ، يقعد في الاجازة يقولوا ارحم نفسك من الكمبيوتر !! ، مش عارف اعمل ايه يعني !
و والدي مش عارف ماله بيا بقاله فترة كدا زي ما يكون مستقصدني ، و كأن البيت كله خلص من المشاكل و مفيش غيري !
شوية يقعد يكلمني عن التخن و اضراره و انه وحش و مش عارف ايه كدا ، مع انه المفروض عارف اني في فترة الامتحانات طبيعي جدا بتخن شوية عشان نشاطي بيكون محدود شوية و بحاول اركز في المذاكرة ، دا غير اني مش بتخن اوي يعني ، هما كلهم خمسه سته كيلو يعني ! ، و مع اول نشاط بعد ما الامتحانات تخلص برجع عادي خالص !
و برده شوية يكلمني على طول الشخص و ازاي بيأثر في حياته ، و ان مفيش حد بيرضى بالرجالة القصيرين لما يجو يتجوزو و مش عارف ايه ! ، و اني مش ببذل نشاط كبير او بلعب رياضة عشان كدا انا قصير !
طيب اعمل ايه يعني ؟ ، مثلا وزن الواحد ممكن الواحد يتحكم فيه - و ان كان في ناس فعلا مهما عملت بيكون تحكمها في وزنها صعب ، دول يموتوا نفسهم يعني ولا ايه ؟ - ، انما بالنسبة للطول دي حاجة بشكل اساسي وراثية و جزء كبير منها بيتحدد بالوراثة ! - مع ان والدي طويل يعني - ، و برده مع ذلك انا مش قصير اوي ، انا في حدود 171 - 172 سنتي ، يعني مع الشعر و الكوتش ببقي كأني 175 سنتيمتر !!
و الله انا مش هقعد اشغل نفسي بشيء مش بيدي ! ، انما اشغل نفسي بحاجة اقدر اتحكم فيها ، اطور من نفسي ، و ازود مهاراتي و معارفي !
و الموضوع اساسا مش هيفرق يعني في اي حاجة ! ، هو بس في نقطة الجواز دي هتفرق شوية على المستوى الاجتماعي ، و ان الست لازم تكون اقصر من الراجل و مش عارف ايه كدا ، ماشي مفيش مشاكل يعني ، البنات يومين دول خلاص يعني مش ناطحات سحاب ، اكيد هلاقي بنت في حدود الـ 170 سنتي - محدش بس يقولي ان الطول مش مهم خالص ، لا مهم ، و في اكتر من منتدى و خصوصا في المنتديات الطلابية ، اتفتح مواضيع زي دي ، و هل البنت تقبل بولد اقصر منها ولا لأ ، و اغلبهم قال لأ ، و حتى اللي قال ايوه ، مع الوقت و اختلاطهم بالناس اجتماعيا ، كتير منهم هيغير رأيه لـ "لأ" برده - : )
و مع العلم ان اخويا الاصغر مني على طول بقى اطول مني دلوقتي و اخويا الوسطاني قرب يبقى اطول مني ، و معنديش مشاكل يعني و مش هموت نفسي !!
و برده شوية كمان ، يقعد يكلمني عن الكمبيوتر بيخلي الواحد مش اجتماعي ، و بيجيب اكتئاب ، و المفروض انزل اتعامل مع الناس في الحياة الواقعية ، و الكلام ده !
ماشي يعني ، مفيش مشاكل ، بس انا مش من النوع اللي بيحب ينزل الشارع عمال على بطال كدا ! ، بنزل الشارع عشان غرض معين و ارجع تاني ، و لازم يكون غرض محدد و ذو قيمة ! ، مش بعرف انزل و اتصرمح في الشوارع كدا ولا اقف على النواصي ، ولا اقعد مع اصحابي نقعد نجيب في سيرة الناس و ننم ده و نغتاب ده !
اي نعم انا بصنف نفسي اني من المدمنين على الكمبيوتر/الانترنت ، بس اذا كان عندي مسئولية او شيء المفروض اعمله بعمله ، و بقية الوقت بقعد على الكمببيوتر اعمل حاجة مفيدة برده ! ، يعني الموضوع في كل الحالات مش خارج عن الحد !
اللي يغيظيني بقى ان بقدرة قادر كل ده مرتبط بالكمبيوتر بطريقة ما ، و ان في رابط عجيب بين الحاجات دي كلها و بين اني بقعد على الكمبيوتر !!!
---------------------------------------
عموماً ، انا حالياً بدور على اي شغل بعيد عن البيت ، و بعيد عن المنطقة كلها اساساً ، ربنا يسهل و الاقي شغله كويس و متكنش مملة !
ممكن شوية كدا ، و اعمل موضوع عن الحاجات اللي عملتها الفترة اللي فاتت دي ، حتى على الاقل اصحي المدونة شوية : )
# لقيت حاجة شكلها حلو ، اروح اجربها و اعمل موضوع عنها
How to Run Android Applications on Ubuntu
الجمعة، ١٩ يونيو ٢٠٠٩
في
١١:٥٣ م
التسميات:
{
تبعي
}
السلام عليكم و رحمة الله و بركاته
اخيرا الامتحانات خلصت ، حوالي شهر مذاكرة مكثفة و شد اعصاب و توتر ! ، الحمد لله الموضوع خلص على خير و سلام ^_^
في حاجات كتير عاوز اعملها و اكتب عنها ، سواء حاجات شخصية هنا في المدونة او حاجات تقنية في المنتديات ، و طبعاً كالعادة اي افكار بفكر فيها في فترة الامتحانات و المذاكرة اللي قبلها ، بكتبها في ورق عشان اقدر اركز في المذاكرة و في نفس الوقت الفكرة متضعش : )
يعني ربنا يسهل استريح شوية كدا - و انااااااام - و ابدأ ارتب الافكار و اشوف هعمل ايه الاول و هأجل ايه : )
------------------------
اول حاجة عملتها طبعا بعد ما خلصت ، حملت اخر نسخة من اوبنتو - 9.04 - و سطبتها و ظبطت شوية حاجات كدا و و نزلت كام برنامج بستعملهم بشكل اساسي عشان ابدأ الاستمتاع ^_^
اضغط على الصورة للتكبير
----------------------
انا رايح اكمل نوم بقى D:
# اضافة : عدلت لينكات الصور عشان كان في صورتين منهم مش شغالين !
الاثنين، ٤ مايو ٢٠٠٩
في
٥:٤٦ م
التسميات:
{
تبعي
}
السلام عليكم
تدوينة سريعة من الملل الشنيع بتاع الفترة دي !
الامتحانات فاضلها حوالي تلات اسابيع و الامتحانات نفسها هتاخد حوالي تلات اسابيع او اكتر شوية ، يعني فاضل اكتر من شهر و نص على نهاية الدوامة دي !
اليوم عبارة عن اكل و اضيع شوية وقت و اذاكر شوية و انام ،،،، الايام كلها بقت شبه بعض :s
الواحد عمال يذاكر بقاله كتير و المواد كأنها مش عاوزه تخلص ! - مع ان المواد لذيذة جدا بس طويلة اوي ! -
-------------------
المشكلة اغلب نشاطاتي متوقفه بسبب ان مفيش كمبيوتر - بتكلم من انترنت كافيه دلوقتي - ، و اغلب النشاطات التانية عاوزه تركزي و مش هتنفع مع المذاكرة خالص - على الاقل بالنسبة ليا - !
حتى لما قولت اغير جو المذاكرة ، اصحابي اللي كنت بذاكر معاهم كل واحد في حته D:
اخر ما اتخنقت قولت اروح اي حديقة - حديقة الاورمان مثلا - او اي مكان عام و اخد معايا كتابين كدا اتسلى فيهم ، الاقي الجو قلب تراب و رمل و الجو بقى خربان خاااالص :@
و ما زال الملل مستمر لمدة شهر و نص كمان D:
عاوز اخلص بقى ، و ارجع لكمبيوتري العزيز :@
ربنا ييسر الحال ، اهى فترة و تعدي زي كل تيرم : )
السبت، ١١ أبريل ٢٠٠٩
في
٩:٥١ ص
التسميات:
{
تبعي,
فيديو
}
الخميس، ٩ أبريل ٢٠٠٩
في
٧:١٢ م
التسميات:
{
احياء,
تبعي
}
السلام عليكم و رحمة الله و بركاته
في اول الاسبوع روحت كشفت عند دكتور "انف ، اذن و حنجرة" ، بقالي فترة عندي مشكلة في الاحبال الصوتية ، صوتي بقى غرييييب جدا ، كنت متوقع ان المشكلة اساسها الجيوب الانفية ، و اللي اساسا كان فيها مشكلة بسبب نزلة شُعبية جامدة كانت جاتلي في تالته ثانوي ، الحمد لله اثار النزله راحت من زمان ، بس مشكلة الجيوب الانفية بدأت تظهر مع بداية المرحلة الجامعية - من سنتين و شوية تقريبا كدا - ، كنت بحاول قدر الامكان تجنب اي حاجة ممكن تاثر على الجيوب و تعمل التهابات ، بس كانت في شوية اعراض كدا بتيجي من وقت للتاني بشكل خفيف ، لكن الفترة الاخيرة دي الموضوع مأثر اوي على الاحبال الصوتية و بالتالي صوتي : )
من اسبوعين كدا ، كنا عملنا محاضرتين عن البرمجيات الحرة و نظام لينوكس ، تبع "مجموعة مستخدمي جنو/لينوكس في القاهرة" ، طبعا انا كان صوتي في الضياع خالص ، بس قولت مش مشكلة ، اديها محاضرة و هتعدي ، انا هحاضر مش رايح اتجوز يعني D:
كانت اول محاضرة ليا و كانت بشكل عام كويسة ، بس نظرا لانها كانت اول محاضرة ليا قصاد عدد من الناس - العدد مش كبير اساسا D: - فالموضوع كان فيه شوية لخبطة كدا و كنت متوتر شوية بالاضافة اني بعاني في الكلام D:
المشكلة ان برده في محاضرة تانية بكره ان شاء الله ، و برده نفس مشكلة صوتي الخربان ده D: ، و مش هينفع اخد الدوا عشان الدكتور كان الطالب اشعة على الجيوب الانفية قبل بداية العلاج ، و لسه معملتشها :s
بس خير ان شاء الله : )
المهم يعني ، بعد ما روحت للدكتور ، و طلع زي ما توقعت الموضوع ليه علاقة بالجيوب الانفية ، و كتبلي على الدوا اللي لسه مجبتهوش عشان لسه معملتش اشعه D:
لما روحت البيت قولت ادور على معلومات اكتر عن الجيوب الانفية على النت : )
في مقال لطيف و بسيط عن "التهاب الجيوب الانفية" في موقع طبيب دوت كوم .
التهاب الجيوب الانفية
الموضوع بسيط و فيه معلومات و ارشادات مفيدة ، و اول مرة اخد بالي من "الجيوب الجبهية" ، كنت عارف التلاتة الباقيين : )
ربنا يسهل و اعمل الاشعة في اقرب فرصة و ابدا في العلاج و ان شاء الله الموضوع ميكنش مزمن : )
و حافظوا على جهازكم التنفسي و خلو بالكم منه بقى : )
الخميس، ٢ أبريل ٢٠٠٩
في
١٠:٤٠ م
التسميات:
{
تبعي
}
السلام عليكم و رحمة الله و بركاته
اول واجب D: ، تاج مبعوتلي من طارق ، صاحب مدونة شخابيط : )
طارق واحد من الناس اللطيفة اللي عرفتها من على النت ، بس ديماً مشغول عننا بالكلية و الكورسات و مش عارف ايه كدا ، ربنا يوفقه : )
المهم يعني ، التاج اهه :
-----------------------------------------------
- اسمك ؟
احمد .
- المشهور بيه وسط اصحابك ؟
احمد او سكليتون برده - خصوصاً لو اصحابي من النت - ، او غالبا لقب العيلة .
- سنك ؟
20 سنة الا شهرين تقريبا D:
- مجال دراستك ؟
الحقوق (القانون) .
- اسم مدونتك ؟
من غير اسم تقريباً ، بس كاتب "skeleton-eel" بدل ما تبقى من غير عنوان كدا ، بس كنت بفكر اسميها "مجرد مدونة اخرى" بس قولت عادي يعني مش مكشلة يعني :) .
- صورتك الرمزية في المدونة بتعبر عن إيه ؟؟
صورتي الرمزية الحالة المفروض انها رسمة تشبهني ، بس في الحقيقة مبقتش شبه الصورة دي خالص !! بسبب قعادي على الكمبيوتر كتير عنيا دخلت لجوا و ظهرلي هالات سوده تحت العين ، و بقيت عامل زي العواجيز !
بس ان شاء الله فترة و تعدي يعني :)
الحاجة الكويسة في الموضوع اني فعلا بستفيد و بفيد في قعادي على الكمبيوتر مش بضيع وقتي على الفاضي :)
- هل فكرت في اغلاق المدونة والسبب ؟
لا ! ، و حتى لو قفلتها هسيبها زي ما هى كدا من غير ما احذفها ، مش عارف ليه الناس بعد ما تمشي ساعات بتحذف المدونة ! مع ان اي مدونة اكيد فيها حاجة مفيدة ، ممكن اي حد يجي ستفيد بيها بعد ما تمشي او حتى بعد ما تموت :)
- ايه رد فعلك لو حد قل ادبه في تعليق ؟
ده بيتوقف على تعريفك لـ "قل ادبه" ، قله ادب بشتيمه يعني ؟ ولا قلة ادب مجرد سخرية و كدا ؟ ، بس على العموم اي رد فيه الفاظ مش تمام هيتحذف .
- اسوأ مدونة ؟
امممممممم ، مفيش حاجة معينة ، بس عموما اي مدونة بحس ان اللي فيها كلامنجي او الناس اللي ماشية بنظام "خلقنا لنتعرض" ! ، و في الاول و الاخر ده مجرد احساس و مش بيغير من الحقيقة في حاجة :)
- هيحصل ايه للايميل بعد ما تموت ؟
اكيد هيموت معايا ، و الناس اللي اعرفهم على الماسنجر هيقولوا كان هنا في واحد اسمه احمد ، و مش عارف اذا كانوا هيقولوا كان كويس او وحش بس اكيد هيقولوا كان شخص غريب :)
- اديت الباسوورد لحد قبل كده ؟
مفتكرش .
- السفر بالنسبة لك ؟
اكيد حاجة ممتعة D: ، تغيير جو ، و تشوف اماكن جديدة ، و حتى وجوه جديده :)
- الموووود بتاعك ايه ؟؟
كويس و لله الحمد ، بس مرتبك شوية بسبب النتيجة اللي كل ده لسه مطلعتش ، و عاوز اذاكر كويس شوية .
- بتعمل ايه في وقت فراغك ؟
اكيد الكمبيوتر و الانترنت D: ، النت لوحده عالم تاني ، و شوية قراءة و شوية في المكتبة ، و اي حاجة مفيدة يعني ^_^
- الأكلة المفضلة ؟؟
الرز بالسمك - خصوصا لو كان من الاسماك الزيتية زي الماكريل كدا - ، و الكبسة بالفراخ ، و كمان المكرونة بالبشاميل - بقو كام اكله كدا ؟ D: -
- الصفات التي أخذتها من والدي ؟
مش عارف بصراحة ، مفيش حاجة معينة D: ، بس ممكن اقول ايه الصفات اللي ماخدتاهش من والدي D:
كنت ديما بحاول تلافي الصفات الوحشة ، مثلا صفة زي العصبية ، والدي عصبي جدا جدا ! ، انا على العكس تماماً هادئ جدا و بعرف اتمالك اعصابي بسهولة :)
- الصفات التي أخذتها من والدتي ؟
الطيبة و الصبر .
- اكتر ست حاجات بتكرههم ؟
مش هقول الكدب ، الخداع ، الغرور و الحاجات دي لان كل الناس بتكرههم بس الفرق في الاولويات يعني ، بس اقدر اقول من اكتر الحاجات اللي بكرهها :
القول من غير عمل ! - التعميم ! - التعصب ! (التعصب غير العصبية ) - استغلال الجهل عند الناس ! - الاشاعات ! - النمطية ! .
- اكتر ست حاجات بحبها ؟
امممممم ، مش عارف ، بحب كل حاجة بصراحة D: ، بس ممكن نقول :
الكمبيوتر و النت طبعاً - القراءة - تعلم حاجات جديدة - الشخبطة ( دي حاجة شبه الرسم كدا ) - مساعدة الناس - الحرف اليدوية .
و الجنو/لينوكس طبعاً D:
- شخصيتك نوعها إيه ؟
في الحقيقة معنديش وصف معين لشخصيتي ، بس انا شخص هادي قليل الكلام ، براقب في صمت ، مش اجتماعي اوي بس اقدر اتعامل مع الناس كويس ، ديما ما تلاحقني كلمة "غريب" يمكن عشان ليا اهتمامات مختلفة عن اغلب الناس ، ممكن اعمل حاجات مجنونة شوية بس عمري ما اضر حد ، مثابر و متفائل نوعا ما ، بس الاكيد اني في الاخر "انسان" :)
- لماذا دخلت عالم التدوين من الاساس ؟
المدونة مكان افضفض و اكتب الحاجات اللي بفكر فيها بعيد عن التقنية و القانون ، يعني كبديل لقلة الكلام ، و بردو بضيف لينكات لاي موضوع تقني او موضوع مفيد بعمله فى المنتديات .
- أحلي جملة قيلت في وصف مدونتك ؟
مش فاكر بصراحة - مش فاكر ان اتقال حاجة اساسا :)
- اهمية التعليقات بالنسبة لك ؟
اكيد بحترم كل رد يتكتب في المدونة ، بس اساسا اغلب التدوينات عبارة عن واحد بيكلم نفسه ، فمفيش مجال للرد اساسا ، فموضوع الرد ده عادي يعني :)
- احلى بوست كتبته ...ضع اللينك , ثم اذكر لماذا ؟
في المدونة ؟ لسه متكتبش ، انما من الناحية التقنية ، الكتابين دول سعيد جداً اني عملتهم
# المدخل نحو البرامج المفتوحة المصدر .
# الدليل العملي في استخدام اوبنتو لينوكس .
و بحبهم لانهم الحمد لله افادوا ناس كتير :)
- أفضل مدونة قراتها ؟
مش فاكر ، في مدونات كتير اوي حلوة .
- أفضل بوست قراته ؟
برده في مواضيع كتير اوي حلوة قريتها .
- الشغل بالنسبة لي ؟
بالنسبة ليا ولا ليك ؟ D:
الشغل ليه كذا فايدة ، اداة لمساعدة الناس ، طريقة لتحقيق الذات ، و اكيد وسيلة لكسب الرزق .
- الانترنت بالنسبة لك ؟
حاليا الانترنت بقى جزء مني و انا جزء منه ، مكان وااااسع للمعرفة و العلم و مشاركة المعلومات .
- تمرر التاج ده لمين ؟
مش همرره لحد لان تقريبا كل اللي اعرفهم كتبوا التاج ده ، بس اللي عاوزه ياخده - مع اني بكرهه الجملة دي جدا :@ -
بس اللي يقرا التاج يقولي على حاجتين D:
هو ليه اسمه "تاج" ؟ ، المفروض ان التاج بالانجليزي (tag) يعني وسم ، يعني بيستعمل مع مجموعة حاجات ليها نفس الموضوع - اغلب الاسئلة بتاعت التاجات اللي بشوفها ملهاش علاقة ببعض اساسا D:
الحاجة التانية بقى ، محدش عنده عروسة ليا ؟ ، اصل انا بصراحة ناوي اتجوز في اقرب فرصة D:
لا بجد ، يا ريت تدعولي بالزوجة و الذرية الصالحة :) - و كمان ادعو يجو بسرعة مش عاوز استنى كتير D:
الاثنين، ٢٣ مارس ٢٠٠٩
في
١٠:٤١ ص
التسميات:
{
احياء,
تبعي
}
السلام عليكم و رحمة الله و بركاته
الايام دي مليش مزاج اعمل اي حاجة خالص ! ، نتيجة التيرم الاول لسه مطلعطش لحد دلوقتي !
دماغي مش متظبطه خالص بسبب موضوع النتيجة ده ، في كذا حاجة بتعتمد على التقدير اللي هجيبه - و اذا كنت شايل اي مادة لا قدر الله ! ، و حتى نشاطاتي على النت بتتوقف على النتيجة !
اللي يشل الواحد ان تقريبا كل الكليات ظهرت النتيجة بتاعتها ما عدا احنا ! ، اي نعم احنا كتير شوية، بس مش للدرجة دي يعني !
المفروض انها تظهر الاسبوع ده او اللي بعده ، و لحد ما تطلع بقى ، هفضل كدا مزاجي متعكنن شوية !
--------------
و برده لحد ما تطلع النتيجة ، احب اعرفكم بالحرباية بتاعتي 
عن نفسي بموت في الحيوانات عموما ، و الزواحف خصوصاً ، و الحشرات كمان
بحب اتفرج عليهم ، امسكهم ، و كمان اربيهم ^_^ - انا عارف اني هلاقي ناس بتقول عليا مهووس -
و الحمد لله عندي ام "عاقلة" مش زي الامهات التانية اللي تقولك يع و بتخاف من الحيوانات و الحشرات ! - بجد مش عارف هعمل ايه في مراتي لو طلع فيها الداء الغبي ده ! - ، و بالتالي معنديش مشكلة في دخول الحاجات دي البيت - بل و غرفة النوم كمان -
الحمد لله والدي و والدتي مطلعنا - انا و اخواتي - ، مش بنخاف ولا بنقرف من حاجة ، هما بس كانوا بيقولونا ابعدوا عن اي حاجة ممكن تجيب امراض و يعرفونا على الامراض و اعراضها ، معلومات عنهاو كدا يعني ، بجد ربنا يكرمهم :)
اكتر حاجة بتخنق منها في المدينة انها مفهاش حيوانات ولا حشرات متنوعة ! ، مش هتلاقي اكتر من الطوب و الاسمنت ! ، نفسي اسكن في منطقة طبيعية و على البحر ، سينا مثلا ولا حاجة ، بس ده مش موجود غير في الاحلام فقط :)
المهم يعني ، كام صورة لحربايتي المبجلة
و على فكرة ، لونها بيكون احسن من كدا لما يكون قوة ضوء كويسة و حالتها المزاجية تمام ^_^
اضغط على الصور لمشاهدتها بحجم كبير
على فكرة الحرباية وديعة جدا ، و عضتها مش بتوجع خالص ^_^
------------------------------
بجد الحرباية دي من الكائنات الرائعة ، كل حاجة فيها تخليك تقول سبحان الله
((يعني بصراحة كائن فريد من نوعه ,, كل حاجة فيه فريده ,,,
يعني عين الحرباء اللي بتلف في جميع الاتجاهات و كل عين منفصله عن التانية في التركيز
ولا امكاينة تغيير لونها على حسب المكان اللي هى فيه ,,
ولا ايدها ,, المتحورة عشان تقدر تتسلق و تتعلق على الشجر ,,
ولا لسانها و طريقة عمله في اصطياد الحشرات ,,
و لا مرونتها و استغلالها لديلها كيد خامسة ,,
ولا ولا ولا ,,, !!
مخلوق اكثر من رائع ,, فعلا من اروع ما رأيت ,, ))
اخيرا و ليس اخراً ، شويت معلومات عامة و كام جزء صغير من افلام وثائقية عن الحرباء :)
يوتيوب
و لو عاوز فيديوهات اكتر بس ابحث في يوتويب عن chameleon
ويكيبيديا
الحرباء
- للاسف المقال ضعيف جدا ، ان شاء الله هحاول ضيف ليه في اقرب فرصة -
----------------------------------
ملحوظة اخيرة ، انا مش بحتفظ بالحيوانات عندي ، بربيها فترة صغيرة و في الاخر بطلق سراحهافي مكان امن :)
|| 
